Da u Jelabee bad ki bom pataka, leh kmen ka BJP halor ka jingjop ha West Bengal bad Assam

Shillong, Jymmang 04: Ka Bharatiya Janata Party (BJP) Meghalaya kala leh kem hadien ba ka party kala jop kput ha ka jylla West Bengal bad Assam, da kaba kam ruh ba kane ka dei ka jingkylla ba khraw ha ka sain pyrthei ha ka thain shatei lam mihngi ka jylla.
Ha kane ka sngi jong ka jingle kem la sakhi baki dkhot ka BJP Meghalaya la wan ban ia don lang da u Myntri ka sorkr Meghalaya u Bah Sanbor Shullai, u Bah AL Hek u myntri sorkar barim ka jylla nalor kiwei pat ki nongtrei ka party.
Shuh shuh la sakhi ba ki nongtrei ka party BJp ha ryngkat bad ki ar ngut ki MLA ka party ki la ïa leh kmen ha ryngkat ka thang bom pataka, halor ka jingjop jong ka party BJP hapoh ka jylla West Bengal bad Assam.
Haba kren sha ki lad pathai khubor, u Bah M Kharkrang uba dei u nongaiktien ka BJP u la ong ba ka result kaba mih hapoh ka jylla West Bengal ka long kum ka “jingjop jong ka jingshaniah nalor ka jingtieng” bad u la ong ba kane ka pyni ïa ka jingkyrshan ki paidbah kaba nangroi bad kiew ka jingkyrshan ïa ka jingthmu jong u Myntri Rangbahduh ka ri u Narendra Modi, ka Viksit Bharat.
Ka party ka la burom ruh ia u Dr. Syama Prasad Mukherjee bad kynmaw burom ia ki nongtrei ka BJP kiba la duh noh ia la ka jong ka jingim ha ki jingiakynad sain pyrthei ha Bengal.
Ka BJP Meghalaya ka la ong ba ki paidbah ka West Bengal ki la kyntait ia kaei kaba ki khot “ka jingpynsngewbha, ïa ka jingwan rung kyrthep ki mender ne bar-ri, ki kynhun bad ki kam runar,” da kaba jied ha ka jaka jong kata ïa ka lynti jong ka roi ka par bad ka jingshong shngain.
Ki nongialam ka party ki la kdew ruh ïa ka jingpyniaid ïa ka elekshon da kaba iaid beit iaid ryntih, da kaba ai khublei ïa ka jingpyndonkam ïa ki bor pahara ka sorkar pdeng ban pynthikna ba kawei ruh ka vote kan ym lehnoh ei.Ka seng ka la ong ba kane ka jingmih ka dei ka jingkylla kaba khraw ha ka sain pyrthei jong ka Bengal.
Ka BJP Meghalaya ka la ai khublei ruh ïa ki nongïalam ka party bad ki nongtrei ha Assam kiba la lah ban pynïoh ïa ka samoi treikam kaba lai sien lynter.Da kaba khot ïa ka kum ka jingkyrshan kaba khlain ïa ka jingsynshar kaba bha bad ki polisi kiba pynshong nongrim ha ki paidbah, ka BJP Meghalaya ka la ong ba ka result na Assam ka pynskhem ïa ka jingkhlain jong ka BJP ha ka thain shatei lammihngi.
Na ka liang u Bah AL Hek u la pynpaw ba kane ka jingjop ka BJP kan dang ai bor shuh shuh wat ïa ka BJP hapoh ka jylla Meghalaya bad ha u snem 2018, la tikna ba BJP kan jop ïa palat phew ngut namar kiba bun kiba kwah ban pyniasoh bad ka prty.