Nongstoiñ, Jymmang 04: Ha HYC Maweit circle ka la leit ban ïakynduh bad ujor ha u SDO ka PWD Road West Khasi Hills District Nongstoiñ, halor ka jingpyntrei torti ïa ki muri jong ka Surok Maweit-Kulang-Nongjri kaba ka jingjngai ka long 35 kilometer.
U samla Shemphang Tyrsa President HYC Maweit circle ha ka kyrwoh khubor, u la ong ba ka katkum ka jinglap jong ka seng, ka jingpyntrei ïa kitei ka Muri ka long kaba torti bad ki khlem da shna bha ne ki khlem ai Cement (PCC) katkum ka Work Construction.
Ka rukom trei ka long kaba shu leh tang dep kam don jingmut satia bad ka long beaiñ ruh. Kumta na ka liang ka seng ka kyntu ïa ka ophis ban peit bniah bad leit jurip ne shna biang namar ki khlem shna katkum ka plan.
Halor kane ka jingleit ujor jong ka seng HYC Maweit, na ka liang ka ophis ka kular ban shimkhia bad kin phah ban shna biang ïa kitei ki muri kiba la shna. Kumjuh na ka liang ka seng ka kren shai ba kan nang ïai buddien bad ban leit jurip ruh ïa kitei ki muri man ka por ban peit rukom ïa ki rukom pyntrei ym tang ïa ki Muri hynrei ka rukom shna ïa kane ka surok shilynter.
