Plie paidbah u u Wailakmiki Shylla ïa ka Meghalaya Traditional Healing Clinics ha Mawmerang

Mawkyrwat, Jymmang 04 : U Wailadmiki Shylla uba dei u Myntri ka tnad ka koit ka khiah jong ka Sorkar Jylla Meghalaya kum u kongsan ha ryngkat ka jingdonlang u bah Pius Marweiñ u MLA & MDC jong ka Ranikor Constituency, kum u symbud kongsan mynta ka sngi ka 4 tarik u Jymmang, 2026 ula plie paidbah ruh ïa ka Meghalaya Traditional Healing Clinic ha shnong Mawmerang, South West Khasi Hills District.
Ka jingthmu ban buh ïa kine ki jaka ai jingsumar dawai khasi ka long ban pynkhlaiñ ïa ki rukom sumar tynrai hapoh ka distrik bad ha kylleng ki jaka jong ka jylla Meghalaya bad ym tangkata ïa kiba kum kine ki jaka sumar dawai khasi la dep ban buh ruh ha kiwei de ki distrik khnang ban pynjan ïa ki paidbah nongshong shnong lada ki donkam ban leit wad jingïarap lyngba ki dawai khasi.
Shuh shuh ïa kine ki jaka sumar la shna khnang ban pynïasoh ïa ka jingtip shaphang ki dawai tynrai bad ki jingdonkam ha ka koit ka khiah ha ka imlang sahlang da kaba pynbha ïa ka jinglah ban pynïoh ïa ki jingshakri ha ka koit ka khiah ba paka bad ba pura. Shuh shuh ka jingplie ïa ka Meghalaya Traditional Health Clinic ha Shnong Mawmerang ka dei ka sienjam ba kongsan ban tei ïa ka rukom ai jingsumar kaba burom ïa ki riti dustur jong ka thaiñ ha kajuh ka por ban pyndonkam ruh ïa ki jingstad jong ka juk mynta.
U Wailadmiki Shylla uba dei u Myntri ka tnad ka koit ka khiah jong ka sorkar Meghalaya ula kren shaphang ka jingdonkam ban ithuh pura ïa ki dawai tynrai ne dawai khasi bad ban ai ïa ka jingkyrshan kaba biang na ka bynta jong ki khnang ba ki lah ban pynïaid shaphang ban sumar ïa kiba donkam ka jingïarap ha ka koit ka khiah.
Ym tangkata ula pynpaw ba ka Jylla Meghalaya ka don ruh ha ka ïa ki spah mariang kiba riewspah bad ki jingstad tynrai, namarkata ka long kaba donkam ba ïa kine dei ban ïada ha ka rukom kaba dei, kum ka ban pynneh pynsah bad ban pyndonkam ha ka rukom kaba dei da kaba buh ka jingkyrpad ïa ki paidbah ba kin kiar na kaba pynjot pathar ïa ka mei mariang kum kaba thang dusmon ïa ki lum kaba long ka daw jong ka jingduh jait noh ki dawai kynbat. Namarkata, ula maham ba ka jingpyndonkam palat ïa ki jingthung dawai ruh ka lah ban wanrah ïa ka jingduh noh jong ki, bad kumta, ki sienjam ba nyngkong kum ka jingbuh ïa ki kper kynbat ki long kiba kongsan bha haduh katta katta namar ki long kiba ïarap ha ka ban pynïar shuh shuh ïa ka ïing jaiñ jong ki dawai kynbat.
Haba kren ha kaba ïa dei bad ka khuid ka suba ha katei ka jaka sumar ula pynthikna ruh ba un pynbiang ïa ki jingdonkam kum ki jaka leit shabar na ka bynta ki paidbah nongwan shim dawai lyngba ka Swachh Bharat Mission da kaba kyrpad ïa ki ophisar hapoh ka distrik ba kin shimkhia ïa kane ka bynta khnang ba kan long ka jingïarap na ka bynta jong ki. Haba bynrap shuh shuh ïa ka jingkren ula pynpaw ba ka tnad treikam kan wad ki lad ki lynti ban kyrshan ryngkat kaba ai ïa ka jingïatreilang hapdeng ki nongsumar tynrai bad ki riew shemphang ha ka juk mynta khnang ba ki briew kin ïoh ïa ki jingshakri kiba kham bha bad kiba pura ha ka koit ka khiah bad un sa peit ruh ïa ka jinglah ban pynrung ïa kane ka rukom ai jingsumar ha ka MHIS khnang ba kan long ka jingïarap na ka bynta kiba pang ha ka jinglut jingsep.
U Bah M.G. Marweiñ uba dei u President jong ka Seng Nong Sumar Dawai Khasi Nylla Association jong ka South West Khasi Hills District ha ka jingkren jong u, u la ïathuh ba hapoh kane ka jaka sumar dawai khasi kaba la tei ha shnong Mawmerang, South West Khasi Hills District ki don haduh 60 ngut ki nongïarap ban sumar ïa ki briew kiba donkam jingïarap bad ka jinglut ha kane ka long haduh 13 lak tyngka ei ei. “La seng ïa kane ka Seng Nong Sumar Dawai Khasi Nylla Association naduh ka 11 tarik u Lber, 2022”, ong u bah Marweiñ.
Ym tangkata, ula ïathuh ruh ba ha kane ka jaka sumar ki don lai tylli ki kynhun kiba la pyntreikam kita ki long ki nongsumar pang, ki nongsumar khem kum ïa kiba kheiñ shyieng, kiba mynsaw bad kiba ar met bad kawei pat ka kynhun ka dei ha ka bynta ban sumar ïa ki dawai kynbat ha ki jaka rep ba la buh kyrpang.
Kiwei de kiba la donlang ki long naduh u bah B. Mawlong, IAS, Deputy Commissioner ka South West Khasi Hills District, u bah B. Jyrwa, MPS, Superintendent jong ki Pulit ka South West Khasi Hills District, u Dr. F.R. Lartang, District Medical & Health Officer, South West Khasi Hills District, ka Dr. Junie P. Lyngdoh, Assistant Director ka BRDC, Shillong lem bad kiwei de ki ophisar sorkar kynthup ïa ki nongkitkam ka Seng Nong Sumar Dawai Khasi Nylla Association jong ka South West Khasi Hills District kata ka Kong Silbiles Jyrwa kaba dei ka Secretary jong ka Seng.
Ïa ka prokram la pynwai da ka jingkren ai khublei na u bah Thomas Iangjuh uba dei u Junior Scientist, Bio-Resources Development Centre.