ïakynduh ka MSWDA ïa u Dy.CM pan jingïarap halor ki Secondary bad Higher Secondary Skul

Shillong, Jymmang 4 : Ka Meghalaya Schools Welfare Development Association (MSWDA) ka la leit ïa kynduh bad ai dorkhas sha u Symbud Myntri Rangbah ka jylla u bah Prestone Tyndong na ka bynta ban pan jingïarap pisa ne grant- in-aid na ka bynta ki skul Secondary bad Higher Secondary hapoh ka jylla.
Ha kane ka dorkhas ka Seng ka pynpaw ka jingsngewnguh kaba khraw ïa ki jingkular jong u bah Prestone bad ka jingsngewkhia kaba u pyni na ka bynta ki mat kiba ïadei bad ki skul Secondary bad Higher Secondary.
Kane ka pynkynmaw ïa ka jingkren jong u bah Prestone ha ka prokram pynkup burom ki Nonghikai SSA bad 4th Teacher ïa u Myntri Rangbah bad Symbud Myntri Rangbah ha ka 1 tarik Jymmang ha madan Student, Jaiaw. “ Ngi ai ka jingïaroh kaba khraw ïa ka jingkren jongphi kaba la ai pat ka jingkyrmen ba thymmai bad ai mynsiem ïa baroh ki Nonghikai jongka tnad pule puthi”.
Ka MSWDA ka pynkynmaw ba ka la ai jingmut ha ka dorkhas kaba ka la dep ai sha ka sorkar ha ka 13 tarik Iaiong 2026 ba dei ban ailad shwa na ka bynta kito ki skul Secondary kiba pass 50 % shaneng bad katei ka percentage na ka bynta ka SSLC Result naduh u 2019 haduh 2023 kumba la kdew ha ka list jong ka ophis DSEO.
ïa ki jingtip ba kham bniah na ka bynta ki skul Secondary bad Higher Secondary yn sa ai sha ka sorkar hadien ba la ïoh pdiang ïa ka jubab na ka ophis District School Education Officers (DSEO) ong ka dorkhas.
Ka Seng ka ai jingmut ïa u Symbud Myntri Rangbah ban rah ïa kane ka mat hakhmat u Myntri Rangbah ka jylla bad kumjuh ruh ban pynbeit ïa ka jingïakynduh hapdeng ki nongïalam ka Seng bad ka tnad pule puthi ban ïa wad ki lad ki lynti kumno ban pynbeit ïa kine ki jingeh kat kum ka jingtyrwa ba ki la ai.