Shillong, Jymmang 05 : Ka National People’s Party (NPP) ha ka janmiet sngi Nyngkong ka la pynthymmai ïa ki nongkitkam jong ka Mawlai Block kum shi bynta ban pynkhreh na ka bynta ka elekshon MP shiteng samoi bad khamtam eh na ka bynta ka elekshon MLA kaban long ha u snem 2028.
Ïa kine ki nongkitkam ba thymmai la pynskhem da u Working President ka Party Bah Hamlet Dohling ryngkat ka jingdonlang ki nongïalam ba hakhmat ka party kynthup naduh u Prof. Don War, Bah HM Shangpliang bad kumjuh i Kong Grace Kharpuri.
Kine ki nongkitkam ba thymmai jong ka party ha Mawlai ki kynthup ïa u Bah N Shemborlyne Khongsngi kum u President, nangta u Bah Kynpham Mylliem Umlong bad Bah Elezer Chyne kum ki Vice President. La jied ruh ai u Bah Joflin Marbaniang kum u General Secretary, Bah William Lamare kum u Asst. General Secretary. Nalorkine la jied ruh ïa u Bah Lamphrang Rumnong kum u Joint Secretary.
Ka Party ka la pynskhem ruh ïa u Bah Shining Kharnaior bad Bah Bankitkuparlang Syiem kum i Organising Secretary, Bah Sambor Mynsong kum u Publicity Secretary, Bah Nathaniel Dkhar kum u Education Secretary, Kong Bansuklin Syiemlieh kum i Cultural Secretary, Bah Lamjingsuk Kharpor kum u Social Secretary katba ki adviser pat ki kynthup ïa u Bah Emlang Lytan bad Bah Embhahlang Syiemlieh.
Ha kane ka jingïalang la jied ruh ïa ki 15 ngut ki rangbah ban long kum ki dkhot jong ka Executive Committee.
