Shillong, Ïaiong 30 : U Myntri Khynnah ba dei peit ïa ka tnad ka Agriculture and Farmers’ Welfare jong ka Sorkar Pdeng, u Ramnath Thakur ha ka sngi Palei u la shong ïa ka jingïalang buddien halor ka jingpyntreikam ïa ki skim bapher bapher jong ka sorkar pdeng ha kane ka jylla.
Ha kane ka sngi u la ïa syllok ruh halor ki jingeh ba ki tnad bapher bapher ki ïa kynduh ha ka jingpyntreikam ïa kine ki skim.
Ha ka jingïalang la wan ban donlang naduh u Myntri ka tnad ka Rep ka Riang ka sorkar jylla u Timothy D Shira, nangta u Director, ICAR Research Complex ka NEH Region, ryngkat ki bad ki Head of department, Director jong ka Agricultural Technology Application Research Institute, Umiam,
ki nongmihkhmat na ka Central Potato Research Station, Upper Shillong bad ki ophisar na ki tnad bapher bapher.
Da kaba banjur ïa ka jingdonkam ban pyntreikam pura ïa kine ki skim, u Myntri Khynnah u la ban jur ba dei ban pynrung kham bun ki nongrep ban ïoh ïa kiba bun ki jingmyntoi kiba wan lyngba kine ki skim.
U la kyntu ruh ïa ki tnad treikam jong ka sorkar pdeng bad ka jylla ban ïatreilang ryngkat ryngkat na ka bynta ka bha ka miat jong ki nongrep.
Ha kane ka sngi, u Myntri u la pyllait paidbah ïa phra tylli ki kot lyngkdop ba la pynmih da ka ICAR Research Complex na ka bynta ka thain shatei lam-mihngi jong ka Ri halor ki jingthung jyrngam kum u Cowpea, Dhaincha, Sesbania, bad Sunhemp, ha ryngkat ki buit pynlong sboh wieh ne Vermicomposting.
Kane ka sienjam ka dei na ka bynta ban kyntiew ïa ka rukom rep kaba lait na ka jingai dawai ha ka por ba thung ïa ki jingthung mar rep.
