Sorkar, pynurlong noh ka jingkular ba 8 snem mynshwa

Shillong, Ïaiong 30: Ki paidbah na ka thain East Jaintia kila dawa na ka sorkar Meghalaya Democratic Alliance (MDA) ba kan pynurlong noh ïa ki jingkular ba phra snem mynshwa kata ban plie biang noh ïa ka kam tih dewiong hapoh ka jylla, namar ba u kynjri ka jingduk u la teh la khum ïa ki lak lak ngut ki briew hapoh ka jylla Meghalaya.
Haba kren bad ki lad pathai khubor u Bah Ri-o-dame Shadap uba kam ïa lade kum u riew paidbah u la ong, Ka jingduk ka long kaei kaei kaba la pynsngewsih ïa kiba bun ki longïing longsem.
Haba phai ha kaba ïadei bad ka pule puthi, ka la pynsohsat shisha ïa ki kmie ki kpa ban pynbiang ïa ka jingpule jong ki khun ki kti bad don ruh ki khynnah skul kila hap ban pep skul noh tang shiteng por bad don ruh ki skul kiba la hap ban khang khyrdep ong u Bah Shadap.
Shuh shuh u Bah Shadap u la ong, haba phai ha ki por mynshwa haba don kiba pass ïa ka eksamin matric ki khun da iohi shisha ïa ka jingkem ha ki ïing ki sem, hynrei mynta ka long kaba sngewsih namar ba ki khun ki kti kim ioh kam ioh jam bad kane ka buh jingeh ïa ki khun samla.
“Kaei ka kamram jong ka sorkar khnang ba kane ka jingduk bad ka jingeh yn lah ban weng noh na ki paidbah ka jylla hi baroh kawei” ong u Bah Shadap.
“Katkum ka kaiphod jong ka ISFR 2021 kumba 71 % kadei ka khaw te ban trei ka kam tih dewiong katkum ka open cast mining namar ba kan wanrah ïa ka jingpynjot ïa ka khyndew ka shyiap bad ki mrad khlaw ruh kin duh jait, kumta u Bah Shadap u la kyntu ïa ka sorkar ban wanrah da ka lad ki lynti kiba ïadei bad kiba ïahap ïa ka rukom bat khyndew jong ngi” u la ong.
Shuh shuh u Bah Shadap u la ong ba 12 snem mynshwa naduh ba la khang ka NGT ki briew ha ka jingkut lad ka pynlong ïa ki briew bam thom ïa ka sang da kaba ki hap ban trei beain ne tih dewiong beain.
Katkum ka report jong u snem 2012-13 ka jingioh ban lum khajna ka sorkar tang na u dewiong ka long haduh 357 klur, kumta lada ka sorkar ka sngewkhia kala dei ban pyrkhat thymmai khnang ba ka sorkar ruh kan ioh biang ïa ka khajna na u dewiong, u la ong.
Na ka liang u Bah Yoowan Chyrmang u la ong, “Ha u snem 2014 ki ba bun ki paidbah ki dap da ka jingklumar jingmut ba shah khang ga ka NGT, hynrei ha u snem 2018 kala kular ban pyllait noh ïa u dewiong, kumta ngi kwah ba kan plie lad da kumwei pat halor ka jingtih dewiong.
Halor kane ka bynta u Bah Chyrmang u la kyntu naduh u Myntri Rangbah ka jylla u Conrad K Sangma bad ki ar ngut ki symbud Myntri Rangbah u Bah Prestone Tynsong bad u Bah Sniawbhalang Dhar ban shim khia ïa kane ka jingdawa ki paidbah.