MSL 5: Khur ka Nongkseh ïa ka jingjop kaba bun kol tam, 6 kol thep u Kitboklang; jop ka Khimusniang & Maram

Shillong, ïaïong 30: Ka Nongkseh SSCC bad ka Khimusniang SC ki la pynthikna ïa la ka jong ka jaka ha ka pre-quarterfinal jong ka lympung 5th Meghalaya State League da kaba jop ïa la ki jong ki jingïalehkai ha ka Group A hynne ka sngi Palei ha madan First Ground-SSA Stadium.
Katba ka Nongkseh ka la pynjemkhnap ïa ka Umkaber SCC da kaba thep haduh 16-0 kol, ka Khimusniang pat ka la pynliem noh ïa ka Mawshun SCC da 3-1. Kawei pat ka jingïalehkai jong ka Group G ha kane ka sngi, la sakhi ïa ka Maram FC kaba la pynliem da 5-1 ïa ka Balmanduri ha Williamnagar.
U Kitboklang Pale u la wanrah ïa ka jingïalehkai ba kyrpang ha madan da kaba thep hynriew kol ha ka jingjop jong ka Nongkseh. U la pynkhihjar ha ka minit kaba 32, 35, 39, 54, 75 bad 82. Ki la don ruh sa ar tylli ki hat trick ba la thep da u Shano Tariang (69′, 89′, 90’+2) bad u Chesterpaul Lyngdoh (33′, 52′, 79′) – bad kane kadei ka hat trick kaba lai na ka bynta u Chesterpaul hadien san tylli ki jingïalehkai. U Hardy Cliff Nongbri (66’, 90’) bad u Pynbhalang Suting (76’) ki dei kiwei pat kiba la ïoh pynkhihjar ha kane ka jingïalehkai kaba la long kawei na ki jingïakhun ba bun kol tam ha ka histori jong ka MSL. Ka la don ruh ka kol ba la kum thep hi da ka Umkaber ha ka minit kaba 10.
Kham hashwa, ka Khimusniang (West Jaintia Hills) ka la ïoh ban pynkhihjar tang katto katne minit mar ïa sdang lyngba u Meroily Lytan (10’) hynrei ka Mawshun ka la pynïakhaid shipor lyngba u Restorewell Marbaniang (72′) ha ka kylla miet. Ka jingkmen jong ka Mawshun ka la neh tang 3 minit, ha kaba u Civility Khongmalai u la thep na ka free-kick ha ka minit kaba 75 shuwa ba un bynrap sa kawei ka kol ha ka minit kaba 78.
Da kaba khur 15 bad 12 point marïabud, ka Nongkseh bad ka Khimusniang ki la thikna ban pyndep ha ka thup kyrdan Top 2 ha ka Group A, watla ïa ka kyrdan ba nyngkong bad ba-ar hapdeng jong ki yn thikna tang ynda kine ki arliang mamla kin ïakynduh biang ha ka 06 tarik u Jymmang.
Ha kawei pat ka jaka, ha Williamnagar, u Bris Taro (63’, 73’, 83’) u la long u rangïalehkai ba thymmai ban thep hat-trick katba u Tremarchwal Ch Marak (37’) bad u Easter Salchang Ch Sangma (90’) ruh ki la ïoh ban pynkhihjar na ka bynta ka Maram kaba wan ba-ar ha ka Group. Ka shi kol jong ka Balmanduri la thep da u Chichang M Momin (71’). Ka Balmanduri ka don ha ka kyrdan kaba saw na ki san tylli ki kynhun ba don ha ka Group G.