Sarong ka MeSCMA ba lah pyndep u Kyrmenskhem Lyngdoh ïa ka Mountaineering course ha Darjeeling
Shillong, ïaïonng 30: Ka Meghalaya Sport Climbing and Mountaineering Association (MeSCMA) lyngba ka kyrwoh ka la pynpaw ïa ka jingsngew sarong hadien ba u samla B Kyrmenskhem Lyngdoh u la lah ban pyndep ïa ka prokram ai jinghikai ha ka Basic Mountaineering Course kaba la pynlong ha Himalayan Mountaineering Institute (HMI) ha Darjeeling.
U samla Kyrmenskhem, ba shong ba sah ha Upper Lumparing bad uba dang pule ha Shillong College, u la shim bynta ha kane ka prokram kaba la sdang naduh ka 01 tarik haduh ka 28 tarik u ïaïong, ha kaba u la khur ruh ïa ka kyrdan ba nyngkong ha ka jingïakop Sport Climbing.
ïa ka jingleit shim bynta jong u samla Kyrmenskhem sha katei ka prokram la kyrshan da ka Ophis jong u Director, Directorate General ka Assam Rifles, Laitkor.
Ha kane ka prokram ai jinghikai, u samla Kyrmenskhem u la pyndep ban kiew sha kliar jong u lum Renok (5025m) kum shi bynta jong ka prokram pyntbit haba kiew ïa ki lum kiba kynjang, kaba pyni ïa ka bor, ka jingtbit bad ka jingkut jingmut jong u.
Hadien ki taïew jong ka shah shitom ban pyntbit ïalade ha ki jaka lum, ki nongshim bynta kiba shah hikai ki la pyndep ïa ka sienjam kaba kongsan bad kaba nyngkong eh jong ki sha ka kam kiew lum ha ka pyrthei. Ka jingïalang pynkut ïa ka prokram ai jinghikai, kaba la long ha ka 28 tarik u ïaïong 2026, ka la long ka jingïalang kaba sngew sarong bad kaba sah jingkynmaw na ka bynta baroh ki nongïashim bynta.
Kane ka prokram ka la ai ïa ka jingtip kaba bñiah ïa ki buit ba kongsan ha kaba ïadei bad ka kam kiew lum, kynthup ïa ka rock climbing, ice craft, route navigation, bad kumno ban im ha ki jaka ba kynjang. Nalor ka jingtip ha ka liang ka jingstad, kane ka prokram ka la wanrah ïa ka jingsngewskhem, ka jinglah ban ïakhun, bad ka jingkhlaiñ jong ka jingïatreilang hapdeng ki nongïashim bynta.
Ka jingïalang ka la kut da ki kyntien ai mynsiem na u Officiating Principal, u Captain Neeraj Kumar, uba la ai mynsiem ïa ki samla kiba la pyndep ïa ka jingpule ba kin bteng ïa ka jingïaid lynti jong ki da ka jingkut jingmut, ka jingsngewrit, bad ka jingburom kaba jylliew ïa ka mariang.