5 klur plie mawnongrim ban pynheh ïa ka madan Tirot Sing Memorial ha Nongkhlaw

Nongstoiñ, Ïaiong 30: U Myntri ka Sorkar Jylla u ba dei khmih ïa ki kam ïalehkai bad ka Koit ka Khiah ha ka jylla, u bah Wailadmiki Shylla u la leit ban buh ïa u mawnongrim na ka bynta ban shna pynbha bad pynheh ïa ka madan ïalehkai jong ka Tirot Sing Memorial kaba don ha Nongkhlaw ha ka jingmang pisa kaba 5 klur tyngka, ka jingshna kaba kynthup ruh ïa ka VIP Gallery.
Ha kane ka jingleit buh mawnongrim, la synranlang ha kane ka sngi 30 tarik u Ïaiong 2026, da ka jingdonlang u local MLA bah Metbah Lyngdoh u ba long u myntri ba dei peit ïa ka bording, water resources, nangta ka Deputy Commissioner Kong Anita Kharpor IAS, u Paiem P.M Syiem Syiem ka hima Nongkhlaw. Nangta ki engineer na ka State Sport Council, ki seng samla shnong, ki seng longkmie, ka sport club bad kiwei.
Ha ka jingkren jong u Myntri ki kam sport, u bah Wailadmiki Shylla, u la pynpaw ïa ka jingkmen ba u la ïoh ïa ka lad ban wan buh noh ïa u mawnongrim, na ka bynta ban ïoh sdang noh ïa ka kam ban shna pynbha bad pynheh ïa ka madan ïalehkai, kynthup ruh ïa ki VIP gallery ha ka Tirot Sing Memorial Playground. U la ai ka jingïaroh ïa u nongmihkhmat ka thaiñ bah Metbah Lyngdoh u ba la trei shitom ban pynïoh ïa kane ka skhim.
U la ong ba ka jingwan buh ïa u mawnongrim kam dei tang ka dak, hynrei ruh bad ka kam ba kan ïaid beit sha khmat bad yn ïai buddien ruh ïa ka jingpyntrei ïa ka madan, khnang ban ïoh pyndep ïa ka ha ka por kaba biang.
Shuh shuh u la ong ba ki don bun ki project kiba ka sorkar ka la ai sha ki shnong, hynrei sngewsih ban ong ba na ka liang ki nongshong shnong, kim da don ïa ka jingsngew longtrai halor ki kam pynroi ba ki la ïoh na ka sorkar ïa kiba la mang khnang na ka bynta ka jingmyntoi jong ki.
Kumta, u la kyntu ïa ki paidbah nongshong shnong ban ai ka jingïatreilang bad ka sorkar la ha kino kino ki project, ban sumar bha bad ban nym pynjot ïa ki jingtei ba la ai, namar la mang khnang na ka bynta ka jingmyntoi u paidbah bad ba ki dei ban sngewtrai kum ïa la ka jong, namar baroh ki skhim ne ki projek kiba la ai ka dei jong u paidbah.
U la ong ruh ka sorkar ka la shim ïa ki lad ki lynti ban kyntiew ïa ki kam sport ha ka jylla bad ka jingshna pynbha ïa ki madan, ka dei shibynta ban ailad ïa ki samla kiba don sap ba kin ïoh pyntbit ïalade ha ka sap kaba ki don, khnang ba kin kiew khamtam lei lei ha kine ki sngi ba ki khun samla ki im hapdeng ka jingjyllei jong u drok.
Ka jingdon jong ki jaka kilan met kiba biang kan ïarap ïa ki khun samla ban lait na ki jingmlien ba sniew. U la ong ruh ba ka sorkar jylla ka la shim ruh ïa ki lad ki lynti ban kyntiew ïa ki jaka ai jingsumar hapoh ka jylla, khnang ban pynsuk ïa ka jingdonkam jong u paidbah khamtam ha ki jaka nongkyndong.
Na ka liang u Bah Metbah Lyngdoh Myntri ka sorkar, u la pynpaw ïa ka jingkmen ba la ïoh ban pynurlong ïa kane ka jingangnud jong u paidbah ban ïoh noh ïa ka madan kaba khambha. U ai khublei ïa ka mynsiem ïatreilang jong ki paidbah bad ka sorkar ha baroh ki liang ba kane hi kan ïarap ban kyntiew ïa ki shnong ki thaw bad ruh ïa ka thaiñ baroh kawei.
Ha kane ka juh ka sngi, na ka liang u myntri ki kam sport bad u myntri ba dei pei ïa ka bording ki la pynlong ïa ka jingleit jngoh ïa ka CHC Nongkhlaw, ban buddien halor ka rukom treikam bad ai jingshakri jong ka ïa ki paidbah.

Ka prokram ïalehkai mynta ka sngi Thohdieng (Por 3 baje nohphai sngi):

Group A (Shillong SSA Stadium) – Ym don

Group B (Shillong MFA Ground) – Mawlum Tyrsad SCC pyrshah ïa ka Mulang SC Nongbah

Group C (Amlarem) – Laskein SCSC pyrshah ïa ka Amlarem SC

Group D (Khliehriat) – Thangskai Tiger SC pyrshah ïa ka Rymbai Shkenshynriah SC

Group E (Wahiajer) – Iatyllilang Lumsehkot CSC pyrshah ïa ka Shillong Lajong FC

Group F (Mairang) – Langsning FC pyrshah ïa ka Lawbah SC

Group G (Williamnagar) – A’chik SCO Rongjeng pyrshah ïa ka Attong Matgrik FC

Group H (Mawkyrwat) – Rangdajied United FC pyrshah ïa ka Seng Samla Umdang Pyllun