Na Sikkim plie u Myntri Rangbahduh ka Ri ïa ka Indoor Cricket Academy kaba 23 klur ha madan Kurkalang

Nongpoh, Ïaiong 28 : U Myntri Rangbahduh ka Ri, u Narendra Modi, mynta ka sngi u la plie paidbah ïa hynriew tylli ki Indoor Cricket Academy jong ki jylla bapher bapher jong ka thaiñ Shatei Lam Mihngi na ka jingïalang kaba la pynlong na Gangtok, Sikkim ba kynthup ruh ïaka Indoor Cricket Academy jong ka Meghalaya Cricket Association (MCA) kaba la tei ha Madan Kurkalang haka jinglut kumba T.23 klur.
Na bynta ka jylla Meghalaya, kane ka jingïoh ïa ka Indoor Cricket Academy ka dei ka jingkyrkhu kaba khraw eh ïa ki samla kiba sngewtynnad ban ïalehkai Cricket. Nangne shakhmat, kin ïoh lad ban pyntbit bad pynkhreh ïalade ha ka jingïalehkai, khamtam ha ki por slap haba ym lah ban pyndonkam ïa ki madan shabar.
Ha kane ka Academy jong ka MCA, la pynbiang ruh ïa shibun ki jingdonkam kum ka Swimming Pool, ka Gym kaba la tip kum ka High Performance Fitness Centre, ki Indoor Practice Pitch, lem bad kiwei pat ki jingtei kiba la pynitynnad bad pynbit pynbiang na bynta ki nongïalehkai.
Haba kren sha ki lad pathai khubor, u Vice President ka MCA, u Bah Rajiv Bareh, u la pynpaw ka jingsngewnguh ïa u Myntri Rangbah duh ka Ri u Narendra Modi halor ka jingplie paidbah ïa kine ki Academy, kynthup ruh ïa kaba ha Meghalaya. U la ai jingïaroh ruh ïa ki nongïalam barim jong ka MCA, naduh u Naba Bhattacharjee bad u Bah Gedion Kharkongngor, kiba la trei shitom ban pynurlong ïa kane ka projek, kumjuh ruh ïa u Bah Rayonald Kharkami uba dei u Secretary ba mynta.
Na ka liang u Bah MacDonald Sawain, President ka Shillong Cricket Association bad dkhot jong ka Ground Searching Committee ka MCA, u la ïathuh ba nyngkong la thmu ban tei ïa kane ka Academy ha Polo, hynrei namar ka jingkhapngiah ka jaka la pynkynriah noh na katei ka jaka bad hadien ba la wad bad jurip haduh 20 tylli ki jaka, ka Dorbar Shnong Lumdaitkhla, Bhoirymbong ka la ai sngewbha ïa ka jaka ha Madan Kurkalang ban tei ïa kane ka Academy, bad la ïateh ia ka soskular kumba 50 snem.
Ha ka jingïalang kaba la long ha Madan Kurkalang ban sakhi ïa kane ka jingplie paidbah, la wan ban ïa don lang da u President ka MCA, u James PK Sangma, u Bah Rayonald Kharkami Honorary Secretary ka MCA, ki President bad ki Secretary jong ki District Cricket Association bapher bapher ka jylla bad kiwei kiwei ki riew rangbah.