Shillong, Ïaiong 28 : Ka Archery Association of Meghalaya ha ka janmiet jong ka sngi Thohdieng jong ka 24 tarik mynta u bnai ka la pynlong ïa ka jingïalang ban pynkup burom ïa ki nong siat khnam ka jylla, kiba la wanrah ïa ka nam bad ka burom ïa ka jylla ha ka Khelo India NTPC Zonal Open Archery Championship 2026 kaba long ha Shillong bad ruh ha ka 1st Khelo India Tribal Games 2026 kaba long ha Raipur Chattisgarh bad ruh kala pynkup burom ïa ki coach bad ki nongïarap jong ka synjuk.
U Kongsan bala wanban don lang ha kane ka janmiet dei u Bah John F Kharshiing Working President jong ka MSOA, nangta u Bah Finely F Pariat General Secretary MSOA kum u symbud kongsan, Kong Matsiewdor War Nongbri Chief Advisor-cum- Chairperson jong ka Archery Association of Meghalaya, u Bah Dipshon Ryntathiang Executive Member MSOA, u High Performance Director jong ka Khelo India Centre of Excellence Meghalaya, nangta ki dkhot ka Archery Association of Meghalaya (AAM) ki coach, supporting staff jong ka AAM, ki kmie kpa jong ki ki khynnah ïalehkai bad kiwei kiwei.
Ha kane ka janmiet ka jingpynkup burom ka long ïa u Devraj Mohapatra uba la ïoh ïa ka takma Ksiar bad u Vivek Sunar ha ka takma Rnong ha ka Recurve Division ha ka Khelo India NTPC Zonal Open Archery Tournament kaba la long ha Shillong ha u bnai Rymphang 2026.
Kumjuh ruh ka la pynkup burom ïa ka kynhun ïalehkai ba la ïakhun ha ka kyrdan jong ka Compound jong ki kynthei kiba la ïoh ïa ka takma Ksiar ba kynthup ïa ka Stracy M Sangma, Nakibansharai Khonghat bad ka Kate Diamond Lyngdoh.
Nalor katta la pynkup burom lang ruh ïa ka kynhun ki rang ïalehkai hadien ba ki la ïoh ïa ka takma Ksiar ha ka jingïakhun ka Compound kiba kynthup ïa U Donkupar L Shadap, Banwanbor Marwein bad Phrangkupar Kharjahrin. .
Nalor katta la bteng ïa ka jingpynkup burom ïa ki nong ïasiat khnam jong ka kyrdan ïakhun ka Recurve Division kiba la ïoh ïa ka takma Rnong ha ka Men’s Team kiba kynthup ïa u Amebalaker Wanniang, Hypormi Wanniang bad u Manchieford Wanniang.
Ha kane ka janmiet,kum ka synjuk, ka AAM kamlah ban khlem da klet ïa ki coach bad ki nongiarap da kaba ka la pynkup burom ïa ki ruh kynthup naduh u Head Coach-cum-High Performance Director u Mim Bahadur Gurung, u Nand Kishore Compound Coach, u Renso Purty Compound Coach, u Jag Prasad Thapa Archery Coach, kong Bansaralin Dhar Archery Coach, u Gunin Changmai SAI Archery Coach, kong A. S. Mercy Archery Coach jong ka Khelo India Centre Sport Excellence, kong Nisha Sharma NLP Sports Physiology bad u Baianehlang Bareh Physiotherapy ka Archery.
