Ther kylla u ma Lahkmen ïa u bah Ardent halor ka jingïalam bakla ïa ka jingdonkam ka MTET

Shillong, Iaiong 24 : U Myntri ka tnad pule puthi u ma Lahkmen Rymbui mynta ka Sngi Thohdieng ula ther kylla ïa u Nongïalam ka VPP u bah Ardent Miller Basaiawmoit uba la kynnoh ba ka sorkar ka niom beiñ ïa ki Nonghikai da kaba bthah ïa ki ba ki hap ban pass ïa ka Meghalaya Teacher Eligibility Test (MTET) da kaba u la pynrem jur ïa kane ka jingkren bad kynnoh ruh ba une u Nongïalam ka VPP um tip ïa ki jingshisha bad um sngewthuh ïa ka jingdonkam jong kane ka Test.
“Kane ka jingkynnoh jongu ba ka sorkar ka niom beiñ ïa ki Nonghikai da kaba bthah ïa ki ba ki dei ban pass ïa ka MTET ka dei kaba donkam ban pynrem jur namar um sngewthuh ïa ka jingshisha shwa ban kynnoh kumtei, nga sngew ba u dei ban wad shwa ïa ki jingshisha balei ba ka sorkar ka shim ïa kane ka rai” ong u ma Lahkmen haba ïakren bad ki lad pathai khubor.
“ Wat la katta ruh u bah Ardent na ka bynta kiei kiei ki bym donkam u ïohi bha na ki ïit khmat ïong jongu hynrei na ka bynta kiei kiei kiba bha ki ïit kmat ïong jongu ki pynmatlah ïa u ban ïohi ïa ki jingshisha” ong u ma Lakmen.
U la ong kane ka MTET ka long kaba donkam kat kum ka Right of Children to Free and Compulsory Education Act 2009 bad la pynksan ruh ïa kane da ka ïing Bishar Supreme Court ha ka 1 tarik Nailur 2025.
Kat kum ka hukum jong ka ïing bishar ka la rai ba baroh ki Nonghikai ki dei ban pass ïa ka Teacher Eligibility Test (TET) wat la ki la hikai slem katno katno ruh lait noh tang kito kiba dang sah sa tang san snem ban don ha ka kam hikai. Kine te ki lait ban ïaleh ïa ka TET tangba kim lah shuh ban kiew kam, u la ïathuh.
Haba kumne mano ba ïalam bakla bad mano ba nion ïa ki Nonghikai namar u ma Lahkmen u la ong ba ka sorkar kam lah ban ïaid lait ïa ki bor ka aiñ.
“ Ngi dei ban sngewthuh ba ïa ngi la synshar da ki bor ka aiñ bad ngi hap ban bud ryntih ïa ki kyndon aiñ.Kane ka aiñ kat kum ka rai jong ka ïing Bishar Supreme Court kam dei kaba treikam tang ha Meghalaya hynrei ha baroh kawei ka ri India bad kiba lait ki dei tang ki skul ba rit ba ria tangba ïa kine ruh ka jingbishar ka dang ïaid shakhmat.
“ Kumta ban ong ba ka sorkar ka niom beiñ ïa ki Nonghikai da kaba bthah ïa ki ban ïaleh ïa ka MTET ka long kaba bakla namar ki Nonghiki ki tip shai bha shaphang kane”ong u ma Lahkmen.
U la ïathuh na ka liang ka sorkar ka la ai ka jingujor sha ka ïing bishar Supreme Court ban bishar bniah biang kumba leh kiwei ki jylla bad ki seng jong ki Nonghikai bad wat ki SSA Association ruh. “ Ka sorkar ruh ka leh namar ka sngewthuh bad kam klet haduh katno ki Nonghikai ki la noh synñiang kiba la shakri khamtam da ki phew phew snem bad na kata ka daw ka ujor ban bishar bniah biang ïa ka kam hynrei haduh mynta hi ka hukum ba la pynmih da ka ïing bishar ha ka 1 tarik Nailur 2025 ka ïeng nongrim beit.
“ Kumta ko ki Nonghikai ba ieit kumba ka long mynta katei ka rai jong ka ïing Bishar Supreme Court ka dang treikam beit bad baroh ki nonghikai ki dei ban pyndep ïa ka TET la kumno kumno ruh shwa ka 31 tarik Nailar 2027” ong u ma Lahkmen.
U la ong kat km ki kyndon ka TET donkam ruh ban pass ïa ka D.El .ED bad dei ban ïoh 45 % ha ka Class XII. “ Ngi ngi la rai baroh ki Nonghikai kiba la don ha ka kam ki lah ban ïakhun ïa ka TET”. Ka tnad pule puthi lyngba ka DERT ka dei kaba ai jingïarap na ka bynta ban pynkhreh ïa ka TET.
“ Ngi la pynmih ruh ïa ki kot jingïarap (Guide/ Help Book) na ka bynta kito ki ban ïaleh ïa ka TET namar ngi kwah ba kin pass. Ki la hikai la bun bun snem shaei kin leit pat lada ka ïing bishar Supreme Court kam pynkylla shuh ïa kane ka rai ban pyndep shwa ka 31 tarik Nailar 2027.
U ma Lahkmen u la iathuh ba u la ai da ka jingthoh sha u myntri ka tnad pule puthi ka sorkar pdeng bad wat u Myntri Rangbah ka jylla u Conrad K Sangma ruh u la ïakren ïa kane ka kam bad ka sorkar pdeng ban pynkylla noh ïa ka RTE Act khnang ban pyllait noh ai kito ki Nonghikai kiba la hikai slem. “ Kumta nga ong biang ban kynnoh ba ka sorkar ka nion beiñ ïa ki Nonghikai ka long kaba bakla bad ka bym shisha bad ka dei tang ka jingïalam bakla ïa ki paidbah kiba ym tip bad sngewthuh shaphang kane ka kam. Kumta pynkhreh bha ïalade kong Nonghikai ka sorkar kan don ryngkat bad phi namar ngin ïatrei lang ban poi sha ka thong”.
“ Ngi la pynmih ïa kine ki kot ai jingïarap ruh namar ba ngi kwah ba ki Nonghikai kin pass. Nga khot sngewbha ruh ïa ka VPP ban ai jingmut lem kumno ngin ïakhun bad kine ki bor ka aiñ kiba don mynta. Lehse da ka jingai jingmut jong phi ngi lah ban jop ïa ki to ngin ym ïa kynnoh iwei ïa iwei. Ai jingmut kumno ban pynkylla ïa kane ka kam bad kumno yn leh ba ki khynnah ruh kin long kiba proh bad tbit ha ka jingpule jongki” pynkut u ma Lahkmen.