Palat 80% myntoi ki paidbah nongkyndong na ka skhim shispahsngi: S.M. Marweiñ

Nongstoiñ, Ïaiong 24: “Ka jingpyntreikam jong ka sorkar pdeng ïa ka skhim shi spah sngi ka la la ju tip paidbah baroh shikatta kum ka Mahatma Gandhi National Rural Employment Guarantee Scheme ha baroh ki jylla jong ka ri, ka pynlong pat ba kito ki skhim jong ka sorkar jylla ki la shu bijai ei bad shu jah rngai khlem paw pyrthei shuh ha ka jylla khamtam eh ha West Khasi Hills District”, ong u Bah S.M Marweiñ uwei na ki riew rangbah ba ju peit pyrman bha ha kaba ïadei bad ka roi ka par ha West Khasi Hills.
U la ong ruh, “Ym lah ban len ba watla ka sorkar jylla ka la mang haduh ar klur tyngka tam ka pisa na ka bynta uwei pa uwei u MLA, ba u dei ban pyntrei ïa ki kam pynroi ha ki Constituency jong ki. Hynrei, kumba long mynta katei ka ar klur tyngka ka shu kut tang ha kaba thied tin, shatri, shawla, blanket, bol bad kiwei kiwei ki jingpynlut ba rit ba ria, kata ruh katto katne bnai shuwa ban long elekshon”.
Shuh shuh, u la ong ba ha ka jingjurip jong u ïa ki shnong ha kylleng ki jaka naduh ki shnong ha ki jaka sor haduh ki shnong kiba ha ki jaka ba kyndong duh, la lap ba ka jingpyntrei kam hok jong ki dorbar shnong ïa ka skhim shi spah sngi, ka la long shisha ka jingkyrkhu kaba khraw ïa ki paidbah, kyrpang eh na ka bynta kito kiba kham kyrduh ha ka ïoh ka kot.
“La lap ba lyngba ka jingpyntrei jong ka sorkar pdeng ïa katei ka skhim na ka bynta ban shna ïa ki surok shnong, ki madan ïalehkai, ki pung dohkha, ki jaka pynlang jaboh, ki sem sniang, ki sem syiar bad kiwei kiwei, ka la pynlong ïa ki shnong ki thaw ba kin kiew ha ka ïoh ka kot bad ka kamai kajih”.
U la ong, “Ka da long kaba itynnad ba na ka bynta ka jingpynïaid ryntih ha ka ban pyntrei ïa katei ka skhim, ka sorkar pdeng ka la mang pisa kyrpang ruh na ka bynta ban shna ïa ki ophis treikam na ka bynta ba ki dkhot bad ki nongkitkam jong ki Komiti kaba kyrpang ba la tip kum ki Area Employment Council. Lyngba kitei ki Komiti ki dkhot bad ki nongkit kam ki hap ban shong pyrkhat kiei ki jait jingtrei ba ki paidbah ki donkam”.
Napdeng ki shnong ba marjan kiba dang lah ban pynïasoh ïa ki jingtrei, ki don kiba la shna ïa kiba kum kitei ki ophis treikam ha ka shnong kaba kham longpdeng, khnang ba ka jingtreikam kan long kaba beit bad bad ïa ki dkhot bad nongkitkam jong ka Komiti, la ju jied lang na kito ki shnong kiba ïa snoh lang ha kaba pyntrei ïa katei ka skhim.