Namar ka buh jingma bad pynthud ïa ka leit ka wan jong u paidbah

Nongpoh, Ïaiong 24: Ka Federation of Khasi Jaiñtia and Garo People (FKJGP), North Khasi Hills District mynta ka sngi ka la leit ban ïakynduh ïa ka kong B. Ranee, Additional Deputy Commissioner ka Ri-Bhoi District, ban aiti da ka dorkhas naka bynta ban dawa ban weng noh ne pynkynriah shawei ïa ka khyrdop GST kaba don ha Umling Ri-Bhoi District kaba la pynthud bad buh jingma ïaki paidbah ba leit ka wan ki kali namar ka jingieng ki trok.
Haba kren sha ki lad pathai khubor, u Bah Ricky Majaw, Secretary, ha ka jingdonlang u Bah Banroy Wahlang, Information and Publicity Secretary, ka North Khasi Hills District lem bad ki dkhot ka seng, u la ong ba katei ka khyrdop GST ka la pynthud ïa ka leit ka wan ki paidbah khamtam mynta ba dang ïaid ka jingshna surok ha katei ka jaka, ka jingïeng ki trok ka la buh jingeh bad jingma ïa ki nongleit nongwan.
Nalor kata, u la kdew ba ki jingjia aksiden ki ju jia man ka por ha Umling, kaba pynlong ïa ka kynhun ban dawa ba dei ban weng mardor ïa katei ka khyrdop na katei ka jaka ban lait na kino kino ki jingjia ba sngewsih ha kaba naka liang ka kong B Ranee kala kular ban shimkhia ïa katei ka kam.