Shillong, Iaiong 24: Ka tnat Directorate of Civil Defense & Home Guards, Meghalaya, Shillong mynta ka janmiet ka la pynlong ïa ka jingpyni paidbah kumno ban pynkhreh jingïada ne ka Mock Drill ha baroh kawei ka Jylla, lada jia ba shah hiar thma kyndit kyndit na suiñ ne ka Air Raid bad ka jingpynlip bording (blackout) ïa kaba la ai kyrteng “ARMEX-I 2026” ha baroh ki District ka Jylla.
ïa kane ka Mock Drill la pynlong ha ki ar bynta, kaba kynthup ban rieh lada don jingshah hiar thma, ban ai jingïarap bad ki jingai jingiarap kyrkieh bad ka Blackout.
Haka bynta I, la pynleit jingmut ha ki jingwad bad ban ai jingïarap ba kyrkieh ban pyllait im, ki jingai jingsumar, ka jingpynkynriah briew. La pynlong ïa ka Mock Drill naduh ka por 3baje janmiet haduh ka por 4baje janmiet.
“Ka siren jong ka Civil Defence kala sawa ha ka por 3:00 janmiet ha baroh ki district ban ai dak ïa ka jingsdang jong ka Mock Drill bad ban pyni nuksa ïa ka jinghiar thma na suiñ (Air Raid)” ong ka Directorate.
“Ha ka por 4:00 PM, la pynsawa biang ïa ka siren ban pyni ïa ka dak ba ym don jingma shuh (All Clear) bad ka jingpynkut ïa ka bynta ba nyngkong.” Hadien ba la dep ïa ka bynta ba nyngkong, la pynlong ïa ka jingïalang kyrkieh ban lum jingtip na baroh ki District.
Ka bynta ba ar ka la pynleit jingmut ha ka “jingsawa jong ki liengsuiñ bad ka jingpynlong ïa ka jingpynlip ding (Blackout) bad la pynlong naduh ka por 6:59 baje janmiet haduh ka por 7:02 baje janmiet.
Ha ka por 7:00 janmiet la pynsawa ïa ka siren jong ka Civil Defence ban ai dak ïa ka jinghiar thma liengsuiñ (Air Raid) bad ka jingsdang jong ka jingpynlip bording (Blackout)” la ong ka directorate.
Ka jingpynlip bording (Blackout) ka la neh ar minit bad la pynkut noh ha ka por 7:02 PM da ka jingsawa jong ka siren ba ym don eiei (All Clear) kaba pyni ïa ka jingkut jong ka Mock Drill.
ïa kane ka mock drill la pynlong ha kajuh ka por ha baroh ki District jong ka jylla ban bishar bniah ïa ka jingpynkhreh bad ka jingïatreilang jong ka tnat civil defence ban ïada ïaki paidbah.
