Pynjari ka District Magistrate ban khang ïa ka jingtih shyiap be-aiñ ha East Khasi Hills

Shillong, Ïaïong 23: Ka District Magistrate ka East Khasi Hills (MCS) ka Kong HML Kynta kala pynjari mardor ïa ka jingkhang tih syiap beain hapoh ka District halor ka nongrim ka jingsngewkhia ïa ka jingpynjot ia ka mariang bad ïa ka koit ka khiah ki nongshong shnong.
Ha ka hukum bala pynmih hapoh ka kyndon 163 jong ka Bharatiya Nagarik Suraksha Sanhita (BNSS), ka District Magistrate kala pynpaw ba ka jingkhlong shyiap haba bun ki jaka na ki wah-khamtam ha shilynter ka Wahniangleng ba don marjan ka Mylliem-kala sdang ban ktah jur ïa ka tyllong um bam umdih bad ka jinglong ka mariang ha ka thain.
Kala pynpaw ba ka jingkhlong syiap pathar kala lam sha ka jingshah rong ka khyndew, ka jingpynjulor ïa ki jingthung jingtep ha ki padun, ktah jur ïa ki dohum dohwah, bad pynjaboh ïa ka um, kaba pynlong ïa ka um ba kan long ka bym shngain ban dih bad ban pyndonkam manla ka sngi.
Ka hukum ka pyntreikam biang ïa ka hukum na ka National Green Tribunal (NGT), kaba bthah ba ym dei ban don ka jing tih par lane khlong syiap khlem ka permit kaba treikam, ka environmental clearance, bad ki licence kiba donkam hapoh ki ain ka Ri.
Haba pyntreikam ïa ka bor, ka bor District kala khang ïa baroh ki jingtih par beain ha ki jaka padun, ban khlong ïa u shyiap na ki wah khlem da ioh ïa ka jingbit kaba biang.
Kala maham ba kano kano ka jingpynkhein ïa ka hukum kan khring ïa ka jingshah pynshitom kat kum ka ain.
Kane ka hokum kan treikam noh mardor ha baroh ka East Khasi Hills tad haduh da pynmih da kawei pat ka hukum.