Ïoh jinghikai ki paidbah Nongstoiñ ban pynkhreh lada jia shah hiar thma kyndit ha ki nongshun

Nongstoiñ, Ïaïong 24: Na ka bynta ban ai jinghikai ïa ki paidbah kumno kin pynkhreh lada jia ki jingshah hiar thma kynsan ka Directorate of Civil Defence and Home Guard jong ka jylla lyngba u Deputy Controller Civil Defence Nongstoiñ mynta ka sngi Thohdieng ka 24 tarik Ïaïong ka la pynlong ïa ka mock exercise ha kaba ïadei bad ka jingshah hiar thma kynsan na suiñ.
Ïa katei ka mock exrecise kaba la sdang da ka jing pynpah siren ha ka por lai baje janmiet kum ka jingpyntip lypa sha ki paidbah nongshong shnong kumno ba kin pynkhreh ban ïada. Ha ka por ba ka siren ka la pah baroh ki dukan ki la khang lut bad baroh ki paidbah nongshong shnong ki la ïasnohkti lang. Hadien ba ka siren ka la sangeh la sdang ïa ka mock exercise ha ki lai jaka kata ha market complex, KJP Synod College bad Nongstoiñ college.
Ha kitei ki mock exercise la ïashim bynta lang da ka Fire & Emergncy Service QRT, Civil Defence & Home Guard, Civil Defense Volunteers, ki dkhot ka Village Defense Party ba la ïalam da ki warden, NCC, NSS, Aapda Mitra Volunteer, ki ophisar jong ka tnat PWD, PHE, DM & HO bad kiwei kiwei ki tnad treikam jong ka sorkar. Hadien ka Mock Exercise la pynlong ïa ka jingïakynduh lang ha Conference hall jong ka ophis jong ka Deputy Commissioner na ka bynta ban bishar bniah ha kaba ïadei bad ka jingïaid beit jong ka prokram.
Shuh shuh ha ka por hynñiew baje thik la pynlong ïa ka jingpynlip bording ha baroh kawei ka sor Nongstoiñ bad ka jingpynlip bording ka long kum ka dak ban lait lada jia ka jinghiar thma na suiñ.