Ka jingthung dieng ka long kum ka jingpynkup jaiñ ïa ka mei mariang (Bah K.P.Pangñiang)

Nongstoiñ Ïaïong 23:Ka jingnang kiew jong ka jingkhluit ka mariang ka dei kawei na ki mat ba ka pyrthei shityllup ka sngewkhia bad ka ju ïakren na ka por sha ka por ha kaba ki ri ka pyrthei ki la ju kyntu ïa ki paitbah ban pynneh pynsah ïa ka mariang khnang ba ka jingkiew jong ka jingkhluit ka mariang kan kham duna.
U bah K.P.Pangñiang MLA barim ka Rambrai Jyrngam constituency uba dei ruh u Co-chairman jong ka tnad khlaw ha ka sorkar jylla haba ïakren bad u nongthohkhubor u la ong ba man la u snem ha ka san tarik u Jylliew naduh ki tnad trei kam jong ka sorkar ki skul bad ki Collge ki ju rakhe ïa ka kum ka sngi pynneh mariang da kaba pynlong ïa ki prokram thung dieng ha ki sawdong jong ki ophis trei kam, ki skul bad ki college.
U bah Pangñiang u la ong ruh ba ka por ka la dei ba kum ki paitbah nongshong shnong ngi dei ban shim khia lang ban thung dieng ym tang ha katei ka sngi san tarik Jylliew hynrei lada ngi phai kat kum ka jing long jingman jong ka aïom naduh u bnai Jymmang ka por ka la biang bha ban sdang thung ïa baroh ki jait dieng bad haduh ba kut jong u bnai Naitung ka dang dei ka por kaba biang bha ban thung dieng.
Ha kajuh ka por u la ong ba ka jingpom patrhar ïa ki khlaw khlem da suidñiew ïa ki dieng kiba dang rit khamtam eh haba ki pom ban thang rnga ka ktah ym tang ïa ka mariang hynrei ki sim kid oh, ki mrad ki mreng ruh kim juh shuh ban shong namar kim ïoh shuh ïa ki jaka rieh kiba biang
Ha kaba ïadei bad ka jing thang rnga u la ong ba ki namar ka jingkyrduh, ka jingduk bad ka jingbym don kam don jam , ka jing bym biang ka bylla ka sngi ki briew kim banse ban pom ïa ki khlaw na ka bynta ban pyndap ïa ka ïng ka sem bad ban kyrshan skul ïa ki khun ki kti bad kiwei kiwei ki jingdon kam.
U la ong ruh ban a ka bynta kane ka sorkar ka la dei ban thaw ki lad ki lynti kumno ban thaw ki skhim na ka mynta ki paitbah. Nalor kata u la ong ba na ka bynta kito kiba im ja da kaba thang rnga ka sorkar ka la dei ban pynshlur ïa ki da kaba thaw ïa ki lad jingïarap ba kin sara da ki symbai dieng ban thung ha ki jaka ba ki la dep thang rnga khnang ba ki jaka kin ym synlen.
U la ong ruh ba lada ka sorkar kan ai jingïarap da ki skhim ïa ki trai jaka kiba ai wai ïa ki khlaw ban pom dieng ne thang rnga ka mariang kan ym synlen bad kan long ka jingkyrkhu kaba khraw ïa ki trai jaka. U la ong ruh ba ka sorkar ka la dei ban thaw da ka komiti ba kyrpang bad ban khot ïa ki rangbah shnong, ki nongïalam jong ki sengsamla shnong ban ai jinghikai ïa ki kumno ban sara ïa ki symbai dieng bad kumno ba kin thung.
Lada ka sorkar ka shim khia halor katei ka mat kan long ka jingmyntoi kaba khraw khamtam eh ha ki shnong kyndong kiba don ïa ki jaka kiba biang. U la ong ruh ba ki nongshong shnong ha ki jaka kyndong ki don ka jingtip kaba biang ïa ki aïom ba bad ka por ba ki symbai jong ki jait dieng bap her bap her ki la biang ka por ban kheit na ka bynta ban pyndon kam.
Shuh shuh u la ong ba kum u nongshong shnong u la ïaleh katba lah ban pynsgewthuh ïa ki paitbah ba kin kiar na kaba pom pathar ïa ki dieng ki siej bad u ju hikai borabor ba ki dei ban tyngkai ïa ki jingdon jingem ha ka mariang kiba u Nongbuh nongthaw u la ai bad u ju ïalam ïa ki samla shnong ban thung dieng, thung kwai na ka bynta ban pynneh pynsah ïa ka mariang.
Ha kajuh ka por u la kyntu ïa ki paitbah ba kim dei ban pynlut por than tang ha kaba pynjot ïa ki khlaw ki btap bad pom pathar ïa ki dieng ki siej hynrei kin pynlut por ruh ha kaba pynbha pat da kaba thung ïa ki tynrai dieng khlem da kheiñ la u dei u dieng soh, u dieng ba rem dor ne u dieng ba tad dor namar lada ki deing ki siej ki la heh ym baroh ki jait dieng ki dei kiba donkam.