MSL 5: 6 kol marwei thep u Primrose na bynta ka Khimusniang; Jop suk ka Langsning, Mawlai, Nongkseh bad ka Nangkiew Irat

Shillong, ïaïong 24: U Primrose Lamat u la long u namtam jong ki jingïalehkai ka lympung 5th Meghalaya State League ba la long hynne ka sngi Thohdieng hadien ba une u rangïalehkai ka Khimusniang SC u la pynkhihjar hynriew sien katba ka kynhun jong u ka la pynjemkhnap ïa ka Umkaber SCC da 11-2 ha ka jingïakhun jong ka Group A ha madan First Ground-SSA Stadium.
Da ka jingïalehkai kaba kyrpang hynne ka sngi, u Primrose (16’, 19’, 24’, 38’, 73’, 79’) u la bat lang ïa ka nam Top Scorer jong kane ka samoi da 7 kol, da kaba ïaryngkat bad u Nelson Rymbai ka Langsning FC uba la pynkhihjar arsien hynne ka sngi. Kiwei pat kiba la pynkhihjar ïa ka Khimusniang ki long u Dawanbiangmi Passah (42′), Alwin Dkhar (69′), u Ravi Manar (80′) bad u Meroily Lytan (83′, 85′). Ki la lamkhmat lypa haduh 5-0 kol shuwa ba ka Umkaber kan pynphai ar tylli ki kol lyngba u Pynkupbor Kharbteng (51’P) bad u Aidor Kharshiing (59′) hynrei ka Khimusniang ka la pynthikna ïa ka jingjop da kaba thep biang sa 6 kol.
Nangta ka jingïakhun jong ka Group H ha Mawkyrwat, la sakhi ïa ka Rangdajied United FC kaba la ïakhaid bad ka Mawlarshong SC da mar 1-1. Ka RUFC ka dei kaba nyngkong napdeng ki klob ba radbah jong ka nongbah Shillong ban nym lah ban jop mynta u snem. U Hopefullness Wanniang u la pynkhihjar ha ka minit kaba 18 hynrei u Gideon Mukhim (41’) u la pynïakhaid shuwa ban jam sha ka por shongthait na ka bynta ka Rangdajied.
Hynrei kiwei pat ki klob na nongbah Shillong ki la jop da kaba suk. Ha ka Group A ka Nongkseh SSCC ka la pynliem da 6-2 ïa ka Mawshun SCC. U Sheen Sohktung (37’, 89’, 90’+4) u la ïoh ban thep ïa ka hat-trik, bad kiwei pat ki kol la thep da u Hardy Cliff Nongbri (4’, 20’) bad u Chanmitre Thma (65’). Baroh ar tylli ki kol ka Mawshun la wan lyngba u Arkhangel Khongtyngkut (45’+1, 60).
Ha Amlarem, ka Mawlai SC, kaba bat ïa ka nam lahduh, ka la pynliem ïa ka Laskein SCSC da 4-1 kol ha ka Group C. U Syndongmiki Lyngdoh (32′), u Danzel Derique Umdor (34′), u Damanbhalang Chyne (41′) bad u Lovingstar Suting (70′) ki la pynkhihjar na ka bynta ka Mawlai shuwa ba u Bundaki Lamare (85′) un thep kawei ka kol na ka bynta ka Laskein SCSC.
Ha Mairang, ka Langsning ka la jop suk da 6-0 pyrshah ïa ka Umlakro SC ha ka jingïakhun jong ka Group F. U Nelson Rymbai (77′, 87′) u la pynkhihjar ar sien hadien ba la sei madan ïa u na ben shong ha ka kylla miet. Nangta u Samuel Phawa (35′), u Kyrmenskhem Mukhim (52′), u Donlad Diengdoh (71′) bad u Morningstar Khongkiang (90′) ki la noh synñiang mar shi kol na ka bynta ka Langsning.
Haba phai sha ka Group B, kaba long ha Shillong, ka Nangkiew Irat ka la pynliem ïa ka Mawlum Tyrsad SCC da 7-1 kol. U Neblejohn Lyngkhoi (9′, 12′, 42′) u la long u rangïalehkai uba lai ban ïoh thep hat trik, katba u Nikelson Bina (12′), u Dibinroy Nongspung (71′) bad u Justerwell Tham (82′, 84′) ki la thep ïa kiwei pat ki kol jong ka Nangkiew Irat, kaba khlem shym la lah satia ban pyndep ïa ka jingïalehkai khlem da shah thep (clean sheet) ha ka sien ba nyngkong mynta ka samoi hadien ba u Pherdinan Khongsit (90′) u la pynphai kawei na ka bynta ka Mawlum Tyrsad SCC.
Ha kajuh ka por ha ka Group G, ka Attong Matgrik FC ka la pynkut noh ïa ka jingshah rem kaba lai sien lynter da kaba pynliem ïa ka Maram FC, kaba wan kyrdan ba ar ha ka Group, da 2-1 ha Williamnagar. Ka Attong Matgrik ka la pynkhihjar lyngba u Pilman Ch Marak (7’P) bad u Willang Jasrang G Momin (27′), katba u Bris Taro (45′) u la thep ïa ka shi kol jong ka Maram.
Khatduh ha Khliehriat, ka jingïakhun hapdeng ar tylli ki klob ïalehkai na Jaiñtia Hills, ha kaba ka Rymbai Shkenshynriah SC jong ka East Jaiñtia Hills ka la lah ban pynliem ïa ka Ladthadlaboh SC na West Jaiñtia da 3-0 kol ha ka Group D. Kine ki lai kol la thep da u Skilful Tariang (33′) bad u Hesmiki Rymbai (51′, 81′).

Ka prokram ïalehkai ha kane ka sngi Saitjaiñ (Baroh kin sdang ha ka por 3 baje nohphai sngi):
Group A (Shillong SSA Stadium) – Ym don jingïalehkai
Group B (Shillong MFA Ground) – Mawphu SC pyrshah ïa ka Mulang SC Nongbah
Group C (Amlarem) – Amlarem SC pyrshah ïa ka Lamin XI SCC
Group D (Khliehriat) – Jalaphet Moochut Pyrdung SC pyrshah ïa ka Thangskai Tiger SC
Group E (Wahiajer) – Lumphyrnai Sohphoh FC pyrshah ïa ka Iatyllilang Lumsehkot CSC
Group F (Mairang) – Mishon SSCC pyrshah ïa ka Lawbah SC
Group G (Williamnagar) – Balmanduri FC pyrshah ïa ka A’chik SCO Rongjeng
Group H (Mawkyrwat) – Mawten SC pyrshah ïa ka SS Umdang Pyllun