Nongstoiñ, Ïaiong 24: Ka lympung 31st District Level Inter School Athletic Meet 2026 kaba lai sngi lynter, ba la pynïaid da ka ophis jong ka District Sports Officer West Khasi Hills District Nongstoiñ, ka la poi sha kaba kut jong ka ha ka sngi thohdieng ha madan Nongpathar Pyndengrei, ha kaba ka Sib Singh Memorial Government Higher Secondary School Nongpyndeng, ka la rah ïa ka nam kum ka lahduh (over all champion).
Ka nam lahduh sha ka Sib Singh HSS ka dei hadien ba ka la ïoh ban kheit 13 tylli ki takma ksiar, 5 tylli ki takma rupa bad 2 tylli ki takma rnong. Ha ka kyrdan ba ar ka St Peters HSS Pyndengrei, ka la khur 7 tylli ki takma ksiar, 6 tylli ki takma rupa bad 4 tylli ki takma rnong. Katba ha ka kyrdan ba lai, ka St John Bosco HSS Rambrai ka la khur 6 takma ksiar, 4 tylli ki takma rupa bad 11 tylli ki takma rnong.
Shuh shuh, ha kane ka lympung ïa ka nam Best Disicipline Team la ïoh da ka Joel Gatphoh Memorial HSS. Ka khusnam Best March Pass la khur da ka Anderson Higher Secondary School Upper New Nongstoiñ bad ha ka kyrdan ba ar la ïoh da ka Assembly of God SS Nongstoiñ.
Nalor ki Best Team ha ki kyrdan bapher bapher, ïa ka nam Best Athlete Under-14 khynnah shynrang la ïoh da u Binraplang Pariong na ka Bethel Pres SS. Katba na ka liang ki kynthei la ïoh da ka Ibashimti Nongsiang na ka Nongtraw SS.
Ha ka Under-16 ki khynnah shynrang, u Wanteikyrpang Marbaniang jong ka Sib Singh HSS u ka khur ïa ka nam Best Athlete. Katba na ka liang ki kynthei la khur da ka Josephine Sohlangpiaw jong ka Don Bosco SS Mawkhlam.
Ha ka Under-18 ki khynnah shynrang u Edify Shyrkon jong ka St Xavier HSS u la khur ïa ka nam Best Athelete. Katba na ka liang ki kynthei ka Aidalin Marweiñ jong ka Sib Singh HSS ka la khur ïa ka nam Best Athelete.
Lah ban pynkynmaw hangne ba ha kane ka lympung Athletic Meet mynta u snem, ki la don haduh kumba 36 tylli ei ei ki skul ha West Khasi Hills kiba la shim bynta shitrhem naduh ka sngi ba la plie pyrda ha ka 22 tarik, ha kaba ka kongsan Kong C.Kharbhih ka la don lang ban ai mynsiem.
Ha ka sngi thohdieng pat kaba dei ka sngi ba pynkut, u MLA jong ka Nongstoiñ Bah Gabriel Wahlang u la don lang ban shim bynta ym tang ha kaba ai jingkren, hynrei ban sam ruh ïa ki khusnam sha ki nongjop bapher bapher. Nalor u kongsan la donlang ruh u Bah Pynshai Momin BDO Shallang kum u symbud kongsan.
Ha kane ka sngi la pynkut da ka prokram ba shongkun ha ka ryngkat ka jingdonlang ka District Sports Officeer Kong Balarina Syiem, ki nonghikai skul, ki khynnah skul, ki riew pawkhmat bad kiwei kiwei pat kiba la sakhi ïa kane ka sngi.
