Nongpoh, Ïaiong 24: Hadien ka jing ïaid shaphrang bad ka jingïaid beit jong ka lympung ïalehkai sports ba 3 sngi ki khynnah skul bala tip kum ka District level Inter School Athletic Meet 2026 bala pynlong da ka ophis u District Sports Officer, Ri-Bhoi District da ka jing wan ban ïashim bynta shitrhem jong 45 tylli ki skul bapher bapher ka Ri-Bhoi, katei ka lympung kala poi noh sha kaba kut mynta ka 24 tarik Ïaiong hadien ba ki khynnah kila ioh ban sei madan ïaki sap ki phong ki jong ki naduh ka sngi Balang bala plie ïaka.
Ïa katei ka lympung ïalehkai sports ki khynnah skul ka Ri-Bhoi la wan ban pynhap pyrda noh da u Bah Mayral Born Syiem MLA ka Nongpoh kum u kongsan bad u Bah Bah R Shadap DSEO ka Ri-Bhoi kum u symbud kongsan, haka jingdonlang ka E Marak Assistant Commissioner ka Ri Bhoi, Bah Bobby L Nongbet DSO ka Ri-Bhoi, ki nongïalam ka RBDSA, ki principal ki nonghikai bad kiwei kiwei ki riew rangbah ka thaiñ Ri-Bhoi ryngkat hajar ngut ki khynnah naki skul bapher bapher.
Ka long ruh ka jingkmen kaba khraw ïaki khynnah skul bad ki nongïashim bynta ha kane ka lympung kiba la ioh mad ïaka jingjop bad kiba la pynpaw ruh ïaka jingkmen bad risa hadien ba kila ioh ban khur ïaki khusnam haki jingïalehkai bapher bapher jong kane ka lympung.
Naka liang ka ophis u DSO kala sam ruh ïaki khusnam Best Team ha katei ka sngi ha kaba haka kyrdan Under-14 ki kynthei la rah da ka MeECL Secondary School, Kyrdemkulai bad haka liang ki shynrang la rah da ka Nongsangu Secondary School, haka kyrdan U-16 pat haka liang ki kynthei la rah da ka St. Alfred’s Secondary School, Marngar bad ka St. Paul’s Higher Secondary School, Nongpoh haka liang ki shynrang, katba haka U-18 pat la rah da ka Nongtluh Higher Secondary School, Diwon haka liang ki kynthei bad ka St. Paul’s Higher Secondary School haka liang ki shynrang.
Katba ïaka khusnam lahduh jong ka lympung Inter School Athletic Meet u DSO ha Ri-Bhoi la rah da ka St. Alfred’s Secondary School Marngar hadien ba kala ioh ban khur bun points tam ha katei ka lympung bala sam ruh ïaka khusnam da u kongsan bad kiwei kiwei.
