SCA Inter School U-18 CT: Rung semi final ka St Nanak Secondary School bad ka K.V. Happy Valley

SHILLONG, ïaïong 24: Ka St Nanak Secondary School bad ka K.V. Happy Valley ki la pynthikna ïa ka jaka ha ka Semi final jong ka lympung Inter School Under 18 Cricket Tournament ba la pynïaid da ka Shillong Cricket Association, da kaba jop ïa la ki jong ki jingïakhun Quarter final hynne ka sngi Thohdieng.
Ka St Nanak Secondary School ka la jop suk da 118 ron ïa ka Shillong Higherr Secondary School, katba ka K.V. Happy Valley ka la pynliem noh da tang 8 ron ïa ka B.K Bajoria.
Haba tied nyngkong hadien ba jop ïa ka jingkynting pisa (toss) ka St Nanak SS ka la lah ba kan kamai 174 ron haduh kaba kut ki 20 ober bad khyllem 5 wiket. U Dhiraj Kumar Mahato u la long uba kongsan tam ha ka tied, da 82 ron naki 55 bol, katba u Ayush Kumar u la kamai 47 ron naki 33 bol. U Sonu Kumar u la khur 4/28 naki 4 ober.
Haba wan beh ïa ka thong ka Shillong Sec School ka la shah weng noh baroh 10 wiket tang na ka bynta 56 ron haki 12.2 ober, bad dei tang u Abhijit Chanda uba la kynjoh sha ka phew ron, da 16 ron naki 19 bol.
U Piyush Kumar Rai u la long u nongkawang bol ba seisoh tam jong ka St Nanak Sec School, da kaba khur 4/1 naki 2.2 ober, hynrei ïa ka khusnam Player of the Match la khur da u Dhiraj Kumar hadien ba u la khur 2 wiket bad noh synñiang ruh 83 ron ha ka por tied.
Ha ka QF kaba bud, ka K.V Happy Valley ka la tied pyndep ïa ki 20 ober ban kamai 134 ron bad khyllem 5 wiket. La lamkhmat ïa ka tied da u Aadit Pradhan (48 ron naki 49 bol) bad u Udit Pradhan (33 ron naki 36 bol). Katba u Shanti Dhoj Sunar u la khur 2/26 naki 4 ober.
Haba pyrshang jubab, ka B.K Bajoria ka la lah ba kan kamai tang 126 ron bad khyllem 8 wiket haduh kaba kut ki 20 ober. La lamkhmat ïa ka tied da u Aryan Sunar (22 ron naki 25 bol) bad u Ayush Ray (21 ron naki 34 bol).
U Imran Ali (4 ober: ailad 22 ron) bad u Himanshu (2 ober: ailad 15 ron) ki la khur mar 2 wiket. Ka khusnam Player of the Match la khur da u Aadit Pradhan.