Katba dang dheng kali ha ka sngi kut ka Shad Suk Mynsiem, bat ka KSU 6 ngut ki nong Bangladesh

Shillong, Ïaïong 14: Naba dheng kali ba dang wan phai kiba phawer na madan Shad Weiking hadien ba la kut noh ka Shad Suk Mynsiem ka Seng Khasi Sengkmie Mawkhar ha ka miet Sngi nyngkong, ki bar jylla kiba la suba jur ruh ba kidei ki mynder ri kiba dei ki Bangladeshi kiba la wan da ka kali Assam na jylla Assam, ki la shah bat noh ha ki dkhot jong ka Khasi Students Union Mawkhar Circle ha ka por 9.30 baje mynmiet napoh jan skul Christian Academy, Riatsamthiah, Shillong.
Kine ki mynder Bangladeshi kiba don kumba 6 ngut eiei kiba la don ka jingthmu ban leit bylla sha Khyndailad, Keating Road bad sha Jailroad ki la shah bat noh ha ki dkhot ka KSU ha ka por ba ki la hiar noh napoh ka kali kamai kaba ki shong ha ka thaiñ Jaiaw Pdeng na ka daw ba kim lah shuh ban ap slem bad shah ia ka dheng kali ha katei ka miet na ka daw ka jingïaid phawer ki khun ki hajar jong ka niam tynrai u Khasi hadien ba la pynkut noh ïa ka Shad Suk Mynsiem kaba ju pynlong manla u snem.
Halor katei, kine ki mynder ri ki la ïaid noh da ka kjat namar jong ka miet ban iaid lyngba na ka surok ïaid kali ka Shnong Riatsamthiah hynrei ki la shah bat noh pat ha ki dkhot ka KSU Mawkhar Circle.
Haba la talasi bad tohkit bniah kitei ki mynder ri la lap ba ki wan bylla sha kane ka jylla khlem ki kot ki sla kiba biang bad hadien ba la pyndep ïa baroh ki jingdonkam, na ka liang ka la phah leit phai noh ïa ki sha ka jaka ba ki wan.
Haba ïadei bad kane ka seng ka la maham tyngeh ïa ki contractor kiba wan ïalam ïa ki sha kane ka Nongbah Shillong ban ai bylla bad lada ka seng ka lap biang kan saleh da ki ki kam kiba tyngeh.