Mawkyrwat, Ïaïong 14: Khnang ba ka kam kan ïaid kham stet ïa ka jingpyntrei ïa ka shlem ai jinghikai ne ka shlem saiñ dur ïa ki khynnah kaba dei ka Eklavya Model Residential School ha Shnong Domjyrti, South West Khasi Hills District, u bah Renikton Lyngdoh Tongkhar uba dei u MLA ka Mawkyrwat Constituency ula hiar jurip ban leit peit da lade ban tip haduh katno ka jingpyntrei ka la long.
Ha kane ka jingjurip u la lap ba ka jingpyntrei ka la long kaba suki palat namar naduh ba sdang ka thong ka long ban pyndep mynta u snem 2026 hynrei na kiba bun ki daw ym shym la lah ban pynurlong ïa kata. Namarkata, ha kane ka jingjurip u bah Renikton ula ïoh ban ïa kren bad u nongpyntrei ne contractor ba un leh khamstet ïa ka kam bad u ruh u la buh ka thong ba ha u snem 2027 un ïaleh ban pyndep.
Kum ban shu kdew ba ka mang tyngka ban tei ïa ka Eklavya Model Residential School ha Shnong Domjyrti ka dei kumba T. 43 klur ei ei ba la bei tyngka da ka Ministry jong ka Tribal Affairs jong ka Sorkar India bad ba la aiti sha ka WAPCOS Limited kaba la plie pyrda ïa u Mawnongrim da u Narendra Modi uba dei u Myntri Rangbah duh ka Ri India ha ka 15 tarik u ‘Naiwieng, 2024.
La ong ba ka jingthmu ban tei ïa ka EMRS ka dei ka sienjam kaba kongsan ha ka jingpyrshang jong ka Sorkar India ban pynkhlaiñ ïa ki lad pule puthi na ka bynta ki jaitbynriew riewlum ha kylleng ka ri.
U Bah Renikton Lyngdoh Tongkhar haba kren ha ki lad pathai khubor hadien ka jingjurip u la pynpaw ka jingkhublei ïa ka sorkar India kaba la don ka jingïohi jngai ban pyntyllun ïa ki kam lyngba ka roi ka par ha kaba ïa dei bad ka jingshakri lyngba ka pule puthi ha kaba ha kane ka South West Khasi Hills District ki la don ki skul pule ba la kyrshan pisa da ka sorkar India kumba la long mynta ka JNV, South West Khasi Hills District ha Shnong Mawlangwir ha kaba kane ka la long shisha ka jingkyrkhu kaba khraw na ka bynta ki khynnah skul.
U la pynpaw ruh ba da ka jingdon sa ïa kane ka Eklavya Model Residential School ha Shnong Domjyrti kan sa long ka jingkyrkhu kaba khraw ym tang ïa ki khynnah pule kiba la don lypa ka jingthmu ban leit pule hynrei kan long ruh ka jingkyrkhu ïa ka shnong ka thaw bad ka dong ka thaiñ baroh kawei.
Haba kren halor jingpyntrei ïa kane ka Eklavya Model Residential School ha Shnong Domjyrti u bah Renikton ula kyntu jur ïa u nongpyntrei ba un trei kham sted ïa ka kam katba lah khnang ba kan long ka jingmyntoi ïa ki paitbah jong ka dong ka thaiñ khamtam ïa ki khynnah ki ban sa ïoh ban leit pule ha katei ka skul.
Ha kane ka jingjurip la donlang naduh u Bah B. Shylla, SDO ka PWD (Roads) Mawkyrwat Division, ki riew rangbah jong ki ar tylli ki shnong jong ka Rangmaw bad Domjyrti lem bad kiwei kiwei.
