Shillong, Ïaiong 10: U Myntri Rangbah ka jylla u Conrad K Sangma, mynta ka sngi u la pynkup burom ïa ki topper ha ka eksamin Secondary School Leaving Certificate Examination 2026 na ri lum Khasi bad Jaintia Hills.
Ha kane ka jingpynkup burom la ïa don lang ruh da u Myntri ka tnad Pule Puthi u Bah Lahkmen Rymbui bad u Commissioner & Secretary ka tnad Pule Puthi, u Vijay Kumar Mantri bad ki heh ophisar na ka tnad pule puthi.
Haba ai khublei ïa ki toppers halor ka jingjop ka jong ki, u Myntri Rangbah ka Jylla, u Conrad K Sangma, u la ong ba katto katne snem mynshwa ka jingpass jong ki khynnah ïa ka eksamin SSCL ka long kaba duna bha bad kane ka la pynkhuslai shibun ïa u.
“Ka la long kaba sngewsih shibun ban ïohi ïa ka jingduna jong ka jingpass hynrei kiei kiei ki la sdang ban kiew bad nga sngewskhem ba ha kine ki snem ban wan kan sa wanrah ka jingkylla ba khraw ha ka liang jong ka pule dangle,” u la ong.
U la pyntip ruh ba kum kane ka prokram ban pynkup burom ïa ki toppers na ri lum Garo yn sa pynlong ha ka 18 tarik mynta u bnai Ïiong, 2026 ha Tura.
“Ka jingthmu jong kane ka prokram mynta ka sngi, ka long tang ban ïa ithuh ïa phi bad ngi sngew sarong ïa phi bad ïa ka jingtrei shitom bad jingminot ka jong phi la sngewnguh bad ithuh,” bad u la kyntu ïa ki topper ba kin iaid shakhmat da ka jinglong ryntih, ka jingminot, ka jingaiti lut bad ka jingminot jong ki.
“Kynmaw ban bud ïa ka mynsiem bad ka jingsngewtynnat jong phi ha ka jingim hynrei to long kiba pynrit mynsiem bad kiba don nongrim,” u la kyntu ïa ki topper ha kaba pynkut ïa ka jingkren jong u.
