Kumba 1600 tylli ki shnong kim don Anganwadi Centre, wadlad bantei bthah ka Estimates Committee

Shillong, Ïaiong 10 : Ka Estimates Committee jong ka Iing Dorbar Thawain ka Jylla, ha ka sngi Thohdieng ka la bthah ïa ka tnad Social Welfare ba kan pan pisa na ka sorkar jylla kumjuh na ka sorkar pdeng na ka bynta ban tei kham bun shuh ki anganwadi centre ha ki palat 1600 tylli ki shnong kiba don ha ka jylla.
Ïa kane ka ka rai, ka Committee ka la shim hadien ka jingïalang bad ki ophisar jong ka tnad hapoh ka jingïalam jong u Bah Mayralborn Syiem, MLA ka Nongpoh kum u Chairman nalor u Bah RV Lyngdoh MLA bad Bah Shakliar Warjri, MLA.
U Chairman haba kren bad ki lad pathai khubor u la ïathuh ba ki don haduh kumba 1600 tylli ki shnong ki bym pat don ïa kine ki centre kumta na ka liang ka Committee ka la bthah ïa ka Social Welfare Department ba kan wad ki lad ki lynti khnang ban ïoh pisa la ka long na ka sorkar pdeng ne sorkar jylla na ka bynta ban ïoh tei shuh ïa kine ki centre.
Ka Committee ka la ïa kren ruh halor ki ishu kiba ïadei bad ka jingshongkha khynnah bad kumjuh haba ïadei bad ka jingarmet khlem pat dei por.
U Chairman u la banjur halor ka jingdonkam ban pynsngewthuh ïa ki paidbah khamtam ki samla lyngba ki sienjam kum ka Mission 1000.
“Ngi donkam ban pynsngewthuh ïa ki khun samla kynthei bad shynrang ba kin lait na ki jingshah pynshoi ba harukom khamtam ka jingshongkha khynnah. Ngi donkam ïa ka jingsnohkti lang jong ki nongïalam niam, ki nongïalam shnong bad ki seng longkmie, ki sengbhalang ban pynsngewthuh ïa ka sienjam ba shim da ka Social Welfare Department.
Shuh shuh u ong ruh ba ka long kaba donkam ïa baroh ban snohkti lang haba ïakhun ïa ki ishu kiba dei jong u paidbah. “Nga sngew ba kadei ka kamram jongngi kum ki nongmihkhmat ban kren ha man la ki jingïalang ban pynshai ïa ki paidbah ba kin ong ïa u drok, ïa ka shongkha khynnah bad ruh ïa ka jingdih bad jingbam ba sniew kiba ktah ïa ka imlang sahlang.”