Shillong, Ïaïong 07: Ka Deputy Commissioner ka East Khasi Hills District ka Kong Rosetta Mary Kurbah IAS haba kren ha ka jingrakhe ïa ka “World Health Day” ka la banjur ïa ka jingdonkam ban shim ïa ka jingai jingmut ki riew stad, namar ka saïan ka la wanrah ïa ki jingkylla ha kiba bun ki liang.
Haba kren ha ka jingrakhe ïa ka sngi ka koit ka khiah ka Deputy Commissioner ka East Khasi Hills District, ha kaba ia kane ka prokram la pynlong ha PCI Shillong, ka la ong ba ka jingdon ki ASHA ka long kaba kongsan namar ki dei ma kiba don ha ki shnong ki thaw kumta ki dei ki budlum ka koit ka khiah ha ka jylla.
Lah ban ong ba ha ka jylla ïa ka rukom ai jingsumar kaba biang, ki don 489 tylli ki dispensary, 110 tylli ki PHC, 23 tylli ki CHC bad 11 tylli ki hospital na ki 12 tylli ki District ha ka jylla bad kane ka jingphah peit ha kaba ïa dei bad ka koit ka khiah ka long kaba donkam bha bad kane ka jingsumar ka long ba baroh ki lah ban leh.
Ha kane ka sngi la ïoh ki jingkren na ki Doktor baroh ha kaba ki la pynpaw ïa kawei ka phang bad kata ka long ban phah peit bniah ïalade na ka por sha ka bor bad haba phah peit lah ruh ban sumar ïalade ha ka por kaba biang, ha kane ka sngi la ïoh ban peit biah ïa ki 30 ngut ki briew shimet kiba la wan ban shim bynta ha kane ka prokram.
