Saudi Pro League: Wanphai u Ronaldo da kaba thep ar kol ban pynskhem ïa ka Al Nassr ha ka kyrdan ba nyngkong

al nassr, Ïaïong 04: U Cristiano Ronaldo u la wanphai sha ka jingïalehkai hadien jingsangeh kaba shibnai namar ka jingmynsaw da kaba pynkhihjar ar sien ha ka kylla miet ha kaba ka Al Nassr ka la pynneh pynsah ïa ka jingjop jong ka da kaba pynliem noh da 5-2 ïa ka kynhun kaba don sha trai duh ka Al Najma ha ka Saudi Pro League ha ka sngi Thohdieng.
Une u rangïalehkai ba shakhmat jong ka Portugal, uba la jah naduh u bnai Rymphang, u la duh ïa ki ar tylli ki jingïalehkai league ba la dep jong ka Al Nassr bad u la shah weng ruh ha ki jingïalehkai paralok jong ka Portugal pyrshah ïa ka Mexico bad ka America ha u bnai ba la dep.
Ka Al Najma kaba la jop tang shisien ha ki 27 tylli ki jingïakhun ha ka league, ka la ïoh ban lamkhmat tang hadien shi minit shuwa ban jam sha ka por shongthait lyngba u Rakan Al Tulayhi (44’).
Hynrei ka Al Nassr ka la jubab mardor, da kaba thep ar tylli ki kol ha ki minit pynjlan jong ka kylla step lyngba u Abdullah Al Hamdan (45+8’) bad u Sadio Mane (45+9’) ban lamkhmat kylla ïa ka jingïalehkai.
Ka kynhun liang pyrshah kaba ïakhun shabar nala ïing (ka l Najma) ka la pynïakhaid shipor ïa ka jingïalehkai ar minit hadien ba la sdang ïa ka kylla miet na u Felippe Cardoso (47’), hynrei ka Al Nassr ka la ïoh biang ban lamkhmat lyngba ka penalty ba la thep da u Ronaldo (56’).
Une u rangïalehkai ba 41 snem ka rta, u la pynbud ïa ka kol kaba ar ha ka minit kaba 73 shuwa ba u Mane (90+5’) un pynskhem ïa ka jingjop da kaba pynkhihjar ha ki minit pynjlan shuwa ban kut ka jingïalehkai.
Ka jingjop jong ka Al Nassr kaba 13 sien lynter ha ka league ka la pynsah ïa ka ha ka kyrdan ba ha khlieh duh da ka 70 poiñ, da kaba tam 6 poiñ ïa ka Al Hilal kaba don ha ka kyrdan ba ar, kaba ïakhun pyrshah ïa ka Al Taawoun ha ka sngi Saitjaiñ.