Naduh 1 tarik u Jymmang yn siew tulop thymmai ka sorkar ïa ki nonghikai SSA bad Adhoc

Shillong, Iaiong 3 : Ka Sorkar Jylla ka la pynkhreh shaid shaid ban pyntreikam ïa ka jingsiew tulop thymmai sha ki palat 23,000 ngut ki nonghikai SSA bad Adhoc naduh ka 1 tarik Jymmang bad ka jingpynshisha ïa ki nonghikai ki ban ïoh ïa kane ka tulop thymmai, kala jan dep artad.
“Ngi thikna ba hapoh kine ki khyndit sngi ban wn, ngin sa lah ban pyndep ïa ka jingpynshisha bad ha ka 1 tarik Jymmang, ngin lah ban siew noh da ka tulop thymmai sha ki nonghikai” ong u Myntri ka Tnad Pule Puthi Bah Lahkmen Rymbui hadien ba dep shong jingialang bishar bniah ïa ki kam ba neh saw kynta ha ka sngi Palei.
Ka Kynhun Myntri ka Sorkar ka la ai jingmynjur ban pynkiew ia ka tulop hapoh ka jingïalam u Myntri Rangbah Conrad Sangma.
U Bah Rymbui ula pynpaw ba katba ka Sorkar ka nang kyntiew kyrdan ïa katto katne ki skul Secondary sha ka Higher Secondary bad nang bynrap da ki stream ba thymmai, ka jingthung kam ïa ki nonghikai ka dang ïai long kawei ka jingeh.
“Ia mynta, ngi dang bteng ban thung kam da ka contract” ula ong haba pynpaw ba ka Sorkar ka dang pyrshang ban leh eiei halor kane ka jingeh bad thmu ban thung noh ïa ki nonghikai ba pura hapoh kine ki khyndiat bnai ban wan.
U Bah Rymbui ula ong “Ngi la ïakren ba kumno ban leh ha ka ban thung kam noh ïa ki nonghikai ha kine ki khyndiat bnai ban wan”.
Ki kam kiba la ïakren ha ka jingïalang ki kynthup ïa ka tulop ki nonghikai part-time, ka jingpyntrei ïa ki jigtei na ka bynta ki college thymmai ha Mawphlang, Patharkhmah bad Rongjeng bad ki kam jong ka University.
U Bah Rymbui u pyntip ba ki Ophisar ki la pynsted ïa ka jngthung kam na ka bynta ki kam kiba lait ha ki college bad ki skul, kiba long hapoh ki kyndon ka aiñ.
Ka jingïalang ka ïakren ruh ïa ka jingpynbeit ryntih ïa ki skul, ha kaba ki District Education Officer ki dang leh ïa ki kam kiba donkam ban weng ïa ki jingeh.
“Kine ki dei ki bynta kiba donkam ban hap shim ha ka ban pynbeit ryntih ïa ka pule puthi hapoh ka Jylla Meghalaya” ong u Bah Rymbui.