Lyngba ki jinglehniam bapher bapher leh burom ki paid riewngeit Khristan ïa ka Good Friday

Shillong Ïaïong 03: Kumba ju long manla u snem ki riewngeit Khristan ha kylleng ka pyrthei ha ka sngi Thohdieng ki la kynmaw burom ïa ka Sngi shah pynshitom bad ka jingshah sahnarphna jong U Jisu Khrist ha ki 2 hajar snem tam mynshwa.
Kane ka jingkymaw burom ïa ka Sngi shah sahnarphna jong U Jisu Khrist la kynmaw burom ruh hapoh ka ri India baroh kawei da ki paid riewngeit Khristan na ki kynhun Balang bapher bapher.
Kumjuh ruh ha jylla Meghalaya baroh kawei ïa kane ka Sngi Thohdieng Bakhuid ne ka Good Friday la pyndon burom ha ki rukom jinglehniam bapher bapher bad ka shongkun shongblei ha ki Ïingmane bapher bapher.
Ha ka Balang Katholik pat kane ka jingleh niam ïa ka Sngi Thohdieng Bakhuid ka la long ha ki rukom bapher bapher kaba la sdang da ka jinglehniam ïa ka lynti jong ka Diengphna, pynbud pat sa da ka jingpynpuson ïa ka jingshah shitom jong u Jisu Khrist kaba dei ki jingkyrpad ba sngewphieng, ka jingduwai ki riewngeit, pynbud ka riti lehniam ïa ka Ktien U Blei, ka jingleh burom ïa ka Diengphna Bakhuid, nangta Ka Kommunion Bakhuid bad ka jingdoh ieid ïa ka Diengphna bad ha ka por janmiet pat ka don sa ka jingïaseng ban duwai na ka bynta ki jingthmu bapher bapher.
Ha kiwei pat ki Balang ruh ka jingleh burom ïa ka Good Friday ka la long kaba shongkun shongblei ha kaba ka la don ka jingpule na ka ktien U Blei bad ki jingpynpuson ki jingkren kiba ïathuh shaphang ka jingshah shitom bad ka jingshah sahnarphna jong U Jisu.
Lah ban ong ba ha kane ka Sngi kiba bun na ki riewniam, ki nongsharai jong ki Balang bapher bapher ki la pynkynmaw ba kane ka dei ka Sngi shah shitom U Jisu Khrist, ka jinglong sngewrit, ka jingdonkam ka jingbishar hok, ka jingmab ïa ki pop ne jingleh bakla jong iwei pa iwei, ki jingshakri ïa ki para briew khlem da kheiñ ïa ka malade na ka bynta ka longbriew manbriew, ka jingphai dien bad ka jingduwai kaba mut ba ka jingngeit ka jingaiti kidei ka lynti ban ïalam ia ka imlang sahlang sha ka hok, ka jingrhem mynsiem bad jingïalong kawei.
La ong ruh ba kane ka sngi ka dei ka Sngi na ka bynta ka jingsuk, ka jingshisha bad ka hok na ka bynta ka bha ka miat jong ki paid U Blei ha kane ka pyrthei, bad ban ai mynsiem ïa ka jingdonkam ban ïalong shipara da ka jingïatreilang hapoh ka imlang sahlang.