Shillong, Iaiong 3 : Ka Sorkar Jylla ka la ai jingmynjur ban tei ïa 186 tylli ki ïingskul Lower Primary bad ki kamra klass thymmai na ka bynta ki Higher Secondary School, kum shibynta na ka jingpyrshang ban kyntiew kyrdan ïa ki ïingskul haba sdang jong une u snem mang tyngka.
Haba pynbna ïa kane hadien ka jingïalang bishar kam ba saw kynta ha ka sngi Palei, u Myntri ka Tnad Pule Puthi Bah Lahkmen Rymbui ula ai burom ïa u Myntri Rangbah ka Jylla Conrad K Sangma namar ka jingmyn jur ïa kine ki project iingskul.
“Nga kmen bha ba u Myntri Rangbah ula mang ïa kumba 186 tylli ki ïingskul jong ki skul Lower Primary bad kynthup ruh ïa ki katto katne ki skul Higher Secondary kiba donkam shuh shuh ïa ki kamra klass” ula ong.
U Myntri ula ong ba ka jingïalang ka ïakren ïa ka jingdon ki nongtrei na ka bynta ki sub division ba dang shu pynkha thymmai, kynthup ki Ophis ki Sub-Divisional School Education Officer.
“Kat ki kam kiba ngi lah ban pynbeit, ngin sa pynbeit noh mardor. Kito kiba dang donkam ïakren bad ka Tnad Personnel, Finance lane bad u Myntri Rangbbah, ngin sa rah ïakren ïa ki” ula ong.
Ka jingmynjur jong ka Kynhun Myntri ïa ka Meghalaya Teachers Training Academy ka la mih ha ka jingïakren ha ka jingïalang.
Ka Tnad Pule Puthi ka la pynmih jingpynbna halor ka Academy bad bthah ïa u Director bad ki Ophisar ba kin shna ïa ka plan ban pyntreikam.
“Ka jingai jinghikai ïa ki nonghikai ka long kaba kongsan bha. Ngi la ban jur ha ki ba kin shna ïa ki plan bad ban rai kumno ban pynïaid ïa ka” ong u Bah Rymbui.
U Myntri ula shong bishar kam ruh halor ka jingpynkhreh na ka bynta ka eksam Meghalaya Teachers Eligibility Test, kaba la pynbna da ka Directorate of Education Research and Training.
U Bah Rymbui ula kubur ïa ki jyrwit jyrwat hadien ka hukum ka ïing Bishar Supreme Court ba ong ba ki nonghikai ba don mynta ha ka kam ki dei ban pass. “Ngi tip ba kan sa mih ka jingeh namar ba bun na ki Nonghikai kin don jingeh bha. Ngi la ïakren kumno, lano ban pynlong ïa ka eksam, bad ba kam dei ban don jingeh hano hano ruh” ula ong.
