Sha Secretariat wan ïalam ïa ki khun, lada ki bus MTC kim wanshaw ïa ki khun la sngi nyngkong

Shillong, Ïaiong 03: Ka jingïalang kaba la long ha ka 02 tarik u Ïaiong, hapdeng ki kmie ki kpa kiba angnud ban ioh phah skul ïa ki khun da ki bus MTC bad kiba dei na ka tnad Transport ha ka jinglam khmat u Bah Shakliar Warjri, MLA ka Mawthadraishan uba dei u Chairman, ha ka Secretariat, ka la pynsngewtynnad ïa ki kmie ki kpa na ka rai ka tnad ban phah sdang kit khynnah skul biang da ki Bus MTC ha kylleng ka nongbah ym da ki Bus STEMS.
Haba kren sha ki lad pathai khubor, na ka liang ka kong Sony Kharjana, ka la ong ba ka jingïalang ka long kaba seisoh ha kaba na ka liang u Chairman u la kular ba yn pynïaid biang ïa ki bos MTC naduh ka 6 tarik Ïaïong, 2026.
Nalor kata, ka la ong ruh ba watla kim pat ïoh da ka jingthoh hynrei u Chairman u la ong don jingshaniah bad lada kam urlong, ki kmie ki kpa ki lah ban wan ïalam ïa la ki khun ha khmat ka khyrdop ka Secretariat.
Shuh shuh ka kong Kharjana kala ong, Te ki kmie ki kpa kiba wan hangne mynta ki don ka jingkyrmen bad ngi sngewthuh ba in pynskhem beit hi ruh ba naduh ka sngi nyngkong kin sdang biang ka jingshakri ki Bus MTC kumba ju long barabor bad ha kaba iadei bad ka dor kim pat ia shim rai.
U la ai ruh ka jingkular ba ka dor kan iapher beit hi na ka na ka dor jong ka STEM namar ba ka ïarap shisha ïa kiba duk ba suk bad u la kular ruh ba ki bus ka MTC kin ym dei shuh kiba rim hynrei kin dei beit kiba thymmai, ong ka kong Kharjana.
Ka Kong Kharjana kala ong, “Na ka liang jong ki kmie ki kpa ha ka jingshisha ki da kwah eh ban ioh da ka jingthoh, hynrei u Chairman u la ong, shanniah beit bad la pyntikna ba lada ha ka sngi Nyngkong ka bus kam wan ban shaw ïa ki khun, phi lah ban wan ïalam ïa ki khun jong phi ha Secretariat”.