Shillong, Ïaiong 01 : U Myntri Rangbah ka Jylla, Conrad K Sangma u la ong ba ki commercial LPG lane ki tyndong lyer ba ju pyndonkam ha ki dukan heh ne jaka kamai ki kyrduh ha baroh kaewi ka ri katba ki tyndong lyer shet ha ki iing briew ha Meghalaya ki dang biang bad lada duna ruh tang khyndiat eh.
“Na bynta ka jingdonkam ha ki iing ki sem ngi dang lah ban pynbiang watla ka don ka jingduna hynrei kam pat dei kaba haduh katta katta,” u la ong haba kren bad ki lad pathai khubor.
Hynrei haba jubab pat halor ki commercial LPG, u Myntri Rangbah u la pyntip ba ka jingduna ka dei ha baroh kawei ka ri. “Kumta ka sorkar ka la pynkiew sha ka 70persen na kaei kaba don mynshwa na bynta baroh ki jylla. La pynkiew mynta na ka 20 persen sha ka 70 persen hynrei ïa ka jingktah na kane ym pat mad haduh mynta. Ngi khmih lynti ruh ba ha ki khyndiat sngi ka suplai kan sa bun bad ngi khmih lynti ruh ba kan sa biang.”
Shuh shuh nalorkata, u la ïathuh ba ka don ruh ka jingeh ba ki kynduh namar 90 persen na ka jingdonkam LPG ka dei kaba hap ban ïaid lyngba ka jaka jong ki Hamas bad dei na kata ka daw ba sa mih ki jingeh.
Tangba u ong pat, ba ka sorkar India ka la shimkhia ïa kane bad ka la pynkhreh ruh ha kiba bun ki kyrdan ban weng ai ka jingeh kaba ki paidbah ki lah ban kynduh.
