Shillong, ïaïong 01: Ka Meghalaya Football Association (MFA) ka la buh ban sdang ïa ka lympung ïalehkai Phutbol ba heh jong ki klob ha ka jylla kaba la tip da ka Meghalaya State League (MSL – 5), naduh ka 11 tarik mynta u bnai ïaiong 2026.
Ha kane ka kynti kaba mynta yn don baroh 33 tylli ki team ne kynhun kiban ïakhun naka bynta ban rah ïa ka nam kum ki lahduh ïa kaba la phiah pat ïa ki ha ki phra tylli ki thup ne group.
Ïa kane ka lympung bah ïalehkai ka Meghalaya Football Association ka dei kaba la ïarap ban kyrshan pisa d aka tnat Directorate of Sports and Youth Affairs ka sorkar jylla.
Dei ha kane ka lympung ba ki lahduh na ki synjuk ïalehkai phutbol ba la pynïasnoh bad ka MFA, ki ïakhun naka bynta ban ïoh ban phong ïa ka pansngiat lahduh jong ka jylla, bad kaba plie lad ruh ïa ki ban bteng ban phrang shuh shuh shakhmat ïa ka lynti ïalehkai ka jong ki ha ki lympung bah ïalehkai Phutbol ka ri ba pynlong da ka AIFF.
Mynta ka snem lei lei ka MSL kan kham long kaba kham kyrpang hadien ba ka MFA ka don hapdeng ka jingrakhe ïa ka jingdap ba 50 snem ka jingseng ïa ka.
Ka jingïalehkai sdang ha kane ka lympung kan long ha SSA Stadium, First Ground, Polo, kaba dei artad ka madan kaban pynlong ïa ki jingïakhun ba dei jong ka Group A ba don lang ki kynhun ïalehkai kum ka Nongkseh SSCC (Shillong SA), Mawshun SCC (Riwar Mihngi Football Association), Khimusniang SC (West Jaintia District SA) bad Umkaber SCC (Tyrsad Area SA).
Ki team ne kynhun ba don ha ka Group B ban long ha madan MFA Turf Third Ground Polo ki kynthup ïa ka Nangkiew Irat SC (Shillong SA), Mulang SC Nongbah (West Jaintia DSA), Mawlum Tyrsad SCC (Tyrsad Area SA) and Mawphu SC (Sohra SA).
Ka Group C kan long ha Amlarem bad ki team kiba la pynïakap ha kane ka thup ki long ka Amlarem SC, Lamin XI SCC (Amlarem Sub-Division SA) bad Laskein SCCC (Laskein Block SA).
Katba ka Khliehriat kan ïoh ba kan pynlong ïa ki jingïakhun ka Group D bad ki kynhun ban ïakhun ki long Ladthadlaboh SC (West Jaintia DSA) bad Rymbai Shkenshynriah SC (East Jaintia DFA) nangta ka Thangskai Tiger SC (East Jaintia DFA) bad ka Jalaphet Moochut Pyrdung SC (Saipung Block SA).
Ka Group E la buh ban pynlong ha Wahiajer bad ki team ne kynhun ba don ha kane ka group ki long Shillong Lajong (Shillong SA), Lumphyrnai Lumsohphoh FC (Thadlaskein SA), Iatyllilang Lumsehkot SCC (Laskein Block SA) bad Lamyrsiang SCC (Saipung Block SA).
Ka Group F kan long ha Mairang bad ki team ban ïakhun ki long Langsning FC (Shillong SA), Mission SCC (Pyndengumiong DSA), Umlakro FC (Western Ri-Bhoi DSA) bad Lawbah SC (Eastern Border SA).
Ka Group G kan don san tylli ki team bad ba la buh ban pynlong ha Williamnagar bad ki team ki long A’chik SCO (East Garo Hills DSA), Atong Matgrik FC (South Garo Hills DSA), Maram FC (Tura DFA), Balmanduri FC (North Garo Hills DSA) bad Janepih Youth SCA (Mawshynrut SA)
Katba ka Group H kan long ha Mawkyrwat bad ki team ba don ha kane ka thup ki long Rangdajied United FC (Shillong SA), Mawten SC (Mawkyrwat DSA), Mawlarshong SC (Nongstoin DSA) bad Umdang SC (Mawshynrut SA).
