Da ka Special Committee yn thung ka EC ka KHADC ban bishar bniah ïa ka jingtyrwa pynkylla AD Rules

Shillong, Lber 31 : Ka Executive Committee (EC) ba la ialam da ka VPP ha Khasi Hills Autonomoud District Council (KHADC) ka la rai ban thung da ka Special Committee na ka bynta ban bishar bniah ha kaba iadei bad ka jingwanrah jingpynkylla ia ka AD Rules.
Halor kane ka Liang Pyrshah ha KHADC ka la pdiang ïa ka rai jong ka Executive Committee(EC) ban thung ïa kane ka Special Committee ka ban khmih ia ka jingtyrwa pynkylla ïa ka AD Rules.
U Nongïalam ka Liang Pyrshah ha KHADC u Bah Titosstarwell Chyne ula pynpaw ïa ka jingkyrmen ba kane ka jingshim rai kan pynïaid sted ïa ki kam.
Hadien ka jingïakynduh bad u Chief Executive Member (CEM) Winston Tony Lyngdoh ha ka sngi Ba-ar, u Bah Titos ula ïathuh ba u CEM ula ai ka jingkular ba kane ka Special Committee kan kynthup ïa ki dkhot na ka Liang Pyrshah, ki Ophisar bad ki Executive Member.
ïa kane ka Committee la khmih lynti ban thung ha ka taiew ban wan bad kan ïakren halor ka jingpynkylla ïa ka Rule 128 bad kiwei ki bynta ba kongsan jong ka AD Rules.
“Kin sa thung ia kane ka Special Committee hapoh ka taiew ban wan bad kane ka Committee kan shong bad bishar bniah halor ka jingpynkylla ïa ka AD Rules ba ïadei bad ka Rule 128 bad kiwei ki bynta ba kongsan kiba donkam ban hap pynkylla kham kloi kat kaba lah” ong u Bah Titos.
U Bah Titos ula pynpaw ïa ka jingkyrmen ba ka jingthung kloi ïa ka Special Committee kan lam sha ka jinglah pynkylla hapoh ka por ba biang ïa ka AD Rules.