Long ki khynnah skul kiba don lypa ïa ka thong ha ka jingim : Ong u Kongsan ha ka Bethel SS Sports Meet

Mawkyrwat, Lber 31 : U Bah Commander Shangpliang, uwei na ki riew rangbah jong ka dong ka thaiñ uba dei ruh u President jong ki nongshna phlim bad jong ka HFU, Central Body, mynta ka sngi u la ïoh ban plie pyrda ïa ka 14th Annual School Sports Meet 2026 jong ka Bethel Secondary School, Nonglang, South West Khasi Hills District.
Kum ka dak jong ka jingplie pyrda, u Bah Commander Shangpliang kum u kongsan u la pynher ïa ka lama jong ka skul bad u la shim ruh ka salute ïa ka jingïaid march past jong ki khynnah skul.
Haba kren ha ka jingïalang, u la pynkynmaw ïa ki khynnah skul ba ha ka jingim kum ki khynnah skul ki dei ban don ïa ka thong ban long ei ei na ka bynta ka la shai la shisngi bad ym tang kata, ki dei ruh ban long kiba minot ryngkat ka jingaiti met bad mynsiem khnang ba kin lah ban kynjoh ha ka jingthmu jong ki.
Shuh shuh, u la ai mynsiem ruh ïa ki khynnah skul ba kin long kiba ïa jan bad ki nonghikai khnang ba kin lah ban ïakren bad pan jingmut ha kiei kiei kiba ki duna ka jingsngewthuh haba ki don hapdeng jong ka jingpule.
Ha kane ka sngi sdang, khnang ba kan long ka jingaimynsiem ïa ki khynnah ha ki kam ïalehkai, na ka liang jong ki nonghikai ki la ïoh ban pynïalehkai ïa ki kum ki jingïamareh bad kiwei de ki jait jingïalehkai ha kaba ki khynnah ki la pynpaw ka jingkmen ryngkat ka jinglah jong ki khynnah ban pyni shisha ïa kita ki sap ki phong ba ki ki don. Ha kane ka sngi plie pyrda ïa kane ka 14th Annual School Sports Meet 2026, la sakhi lang da ka Headmistress, ki para nonghikai bad ki khynnah skul jong ka Bethel Secondary School.