Ka Meghalaya ka dei ka jylla kaba riewspah ha ka kolshor, imlang ka sahlang sawa ka sur ha ka jingïatai nia

Shillong, Lber 29 : Ka Meghalaya ka wan hakhmat eh kum kata ka jylla kaba riewspah ha ka kolshor, ka imlang ka sahlang, kaba kiew sted ha ka roi ka par bad ka khaïi pateng ka dei ka sur kaba la mih ha ka jingïatai nia ha ka tamasa die bam tynrai kaba la tip kum ka Culinary Cascades kaba la pynlong ha Nanpolok.
Kane ka tamasa ba arsngi kaba la kyrshan tylli da ka tnad kam jngohkai ka jylla ka la ïa tyngkhuh artat ba ka Seeti 2.0 kaba dei ka ka tamasa ki khana tynrai kumta la pynlong lang ïa ki ban mad ym tang ïa ki jingbam hynrei wat ban mad ïa ka histori bad khana tynrai.
Haba kren ha kane ka jingïatai nia u Vijay Kumar D Chairman bad Managing Director jongka Meghalayan Age Ltd u la ong ba ka sorkar ka trei shitom ban pynphriang sha kylleng ïa ka kolshor bad ka rukom im tynrai jong ki jaidbynriew trai ri kane ka jylla.
“ Ngi don shibun bah ki khana kiba sngewtynnad ban tip bad ïa kine ki khana donkam ban ïathuh sha kiwei khnang ba kin tip shaphang ka jylla bad ki briew kiba sah ha ka” ong u Vijah Kumar.
U la pynkynmaw ruh ïa ka jingsdang ia ka Meghalayan Age Festival kaba la ïoh ka jingithuh bad pawnam ha kylleng ka pyrthei bad mynta ka jingpyrshang ka long ban tip ïa ka kum kata ka jylla kaba riewspah bad dap da ki jingitynnad ha ka.
Haba phai sha ka liang ka khaïi pateng bad ka ïoh ka kot u la ong ba ka jingkiew jongka Meghalaya ka long ha ka rep ka riang bad don kam ban pynkhlaiñ ïa ka rep ka riang ban lah ban pynmih bun ki mar bad ka ban ai kam ai jam ruh ïa kiba bun ba lang.
U la ai nuksa ïa ka jinglah ban pynmih ia ki marbam kiba khlem sboh dawai kum u shynrai Lakadong, u sohtrun, u sying, u soh shan bad lyngba kine ki kyntiew ïa ka ki nongrep, ïa ki nongkhaïi bad ter ter.
U la banjur ïa ka jingdonkam ban pynkhlaiñ ïa kane ba kan ïarap ai kam ai jam bad kumjuh ruh ban ïoh ka jingithuh ha kylleng ka pyrthei.
Ha ka liang ka kam jngohkai u la ïathuh ba ka jylla ka la nangkiew bad ka la ai kam ai jam ïa kiba bun ba lang da kiwei ki lad ïoh kam ïoh jam. Haba leh ïa kano kano kaba bha tam kaba kongsan pat ka long ban pynneh pynsah ïa ka riti ka dustur tynrai.
U la pynkynmaw ruh ïa ka jingshah jied ki jingkieng jri ha ka UNESCO World Heritage Status. ïa kane ka jingïatai nia la pynïaid da u Dilip Cherian.