Jop ka WKH ha ka sngi sdang ka Inter District Cricket ki kynthei ha Nongstoiñ

Nongstoiñ, Lber 22: Ka kynhun ïalehkai Cricket jong ki kynthei na West Khasi Hills ka la kheit ïa ka jingjop ha ka sngi sdang jong ka Inter District Women under-23 Cricket Tournament, ba la pynlong da ka Meghalaya Cricket Association ha madan NDSA Nongpyndeng Nongstoiñ.
Haba hiar iuh kjat ha madan hynne ka sngi, ki samla kynthei na West Khasi Hills ki la jop shuwa ïa ka jingïakynting pisa bad kam trai ban tied nyngkong. Hynrei, tang hapoh 35 over ka la kamai 207 ron bad hap 9 wiket. Haba beh ïa kane ka thong ba la buh, ki samla kynthei jong ka Shillong Cricket Association ka la ïoh ban kamai tang 181 ron bad hap lut baroh ki wiket. Kumta ka WKDCA ka la jop da 26 ron.
U nam tam jong kane ka jingïalehkai u leit sha ka Silda Micresha Marbaniang jong ka WKHDCA kaba la kamai ron haduh 105 ron, nangta ka Abiezer Kharsyiemlieh ka la ïoh 5 wiket bad khur ruh ïa ka khusnam ‘player of the match’. Katba na ka liang ka SCA, ka Shruti ka la kamai 65 ron bad ka Neha 29 ron.
Na ka liang ki nongpynïaid ka MCA ki la pyntip ba ka jingïalehkai kaba bud kan long ha ka 23 tarik naduh ka por 9 baje mynstep, ha kaba ka Ri Bhoi kan ïakhun pyrshah ïa ka All Jaiñtia Cricket Association.
Lah ban kdew hangne ba kane ka lympung ka don ar tylli ki Zone kata kawei ha Nongstoiñ ba la tip kum ka Zone 1. Katba kawei pat ka Zone ka dei ha Garo Hills. Kiba jop napdeng kine ki Zone kin sa ïakhun phainal, ha kaba ka tarik bad ka jaka yn sa pyntip kham hadien.