Rah nam lahduh ka Warsanlyngdoh S&CC ha ka 2nd Rowell Lyngdoh Memorial FT 2025 – 2026 ha Mawlangwir

Mawkyrwat, Lber 29 : Ka Warsanlyngdoh Sports & Cultural Club ka la long ka lahduh ha ka lympung ïalehkai kynjatbol ba la tip kum ka 2nd Rowell Lyngdoh Memorial Football Tournament 2025 – 2026 ba la pynïaid da ka Mawlangwir Sports Club kaba la long ha Rowell Lyngdoh Stadium, Mawlangwir, South West Khasi Hills District ha ka 27tarik mynta u bnai.
Lah ban kdew ba ka jingjop bad rah ïa ka nam lahduh jong ka Warsanlyngdoh Sports & Cultural Club pyrshah ïa ka Se-La-Jong Football Club ka dei ha ka Tie Breaker ha kaba Warsanlyngdoh Sports & Cultural Club ka la thep da 3 – 2 kol.
Kaba jop ha kane ka lympung ïalehkai ka la rah ïa ka song pisa kaba shi lak tyngka ryngkat ka khusnam bad kaba shah jop ka rah ïa ka song pisa kaba saw phew hajar ryngkat ka khusnam.
Nangta, ki khusnam shimet ki kynthup ïa ka ‘rangïalehkai ba tbit dei u Bardus Lyngkhoi na ka Se-La-Jong Football Club, u nongap kol ba tbit dei u Dajied Myrthong na ka Warsanlyngdoh Sports & Cultural Club bad u nongthep bun kol dei u Sylvester Thongni na ka MLP Football Team.
Hashwa ban sdang ïa ka jingïalehkai, u kongsan ryngkat ki riew rangbah kiba la ïadonlang ki la ïoh ban sam ei ïa ki bol kynjat sha ki paidbah kiba wan sakhi ïa kane ka jingïalehkai phainal.
U kongsan uba la wan ban pynhap pyrda ïa kane ka 2nd Rowell Lyngdoh Memorial Football Tournament 2025 – 2026 u dei u Ma Wailadmiki Shylla, Myntri ka kam ïalehkai jong ka Jylla Meghalaya, ha ryngkat ka jingdonlang u bah Renikton Lyngdoh Tongkhar, MLA ka Mawkyrwat Constituency bad u bah Carness Sohshang, Co-Chairman ka Meghalaya State Development Reforms Commission jong ka Sorkar Meghalaya kum ki symbud kongsan.
Kiwei de kiba donlang ki kynthup ïa ki ophisar sorkar, kiba ha iing jong u (L) Rowell Lyngdoh, (bam kwai ha dwai U Blei) MLA bad Symbud Myntri barim jong ka Jylla Meghalaya, nongkitkam jong ka Mawlangwir Sports Club, ki riew rangbah kiba la shah khot sngewbha lem bad ki paidbah nongpeit kai.