U Pulit kai u don ka jingïadei bad ka seng saiñ pyrthei lyngba ka ïing ka sem: FKJGP

Shillong, Lber 29: Ka Federation of Khasi Jaintia and Garo People (FKJGP) Sengkmie ka pynrem jur halor ka jingjia shah ktah kti u Driver Sumo mynnin ka sngi ha uwei u briew uba kam ïalade ba u dei u Pulit bad byrngem ruh ban sei bad siat ïa utei u Driver.
Ha kaba ïadei bad katei ka jingjia, u Chief Organising Secretary Bah Khrawkupar Nongsiej u la ong ba ka jingleh donbor jong utei u briew ban pyntieng pynsmiej ïa ki paidbah da ka ban thep sha thanad bad ruh ban Siat da ka tiar ka long kaba bakla lada dei mano mano ruh ka jingleh jong utei uba kam ïalade ba dei u Pulit.
“Ka thong hi jong ki Pulit kadei ban shakri bad ïada (Serve and Protect) ïa ki Paidbah bad halor kane ka bynta na ka liang ka Seng ngi dawa ba dei ban shim Action ïa une u briew kat kum ka aiñ bad ban pyntikna ba kino kino kiba don ha ka bor kim dei ban pyndonkam bakla lane ban leh donbor ïa ki rit ki ria” ong u Bah Nongsiej.
Shuh shuh u Bah Nongsiej u la ong, “Ka seng kala ioh jingtip ba utei u briew u dei uba don ka jingïadei bad ka seng saiñ pyrthei lyngba ka ïing ka sem jong u, kumta ka FKJGP ka maham ba ki briew kiba sngew ba ki don jingiadei bad ki bor sorkar kim dei ban shim kabu ban pyntieng pyn smiej ïaki riew paidbah”.
U la ong, Ka aiñ kam dei ban noh shiliang bad lada jia ba kita ki bor jong ka aiñ kim ai da ka jing pynsaja kaba tyngeh ïa utei u briew bad ka seng kan sa leh la ka jong ka kamram pyrshah ïa u.
Kyntang ïawai ka Seng ka Maham ruh ba kino kino ki briew kiba pyndonkam bakla ïa ka bor ka seng kan ym sngap bad yn ym map lada dei sa mano mano ruh.