Shillong, Lber 28 : Ki Pulit ka East Jaintia Hills ha ka sngi Thohdieng, ki la hiar khynra ïa kawei ka par ba tih dewiong beaiñ ha ka shnong Wailong, kaba hap hapoh ka shnong Sutnga bad ïoh kem ia 9 ngut ki nongbylla tih dewiong beaiñ napoh katei ka krem.
Kat kum ka jingpyntip u Superintendent of Police, ïa kane ka jingkhynra la pynlong halor ka jingïoh jingtip ba thikna ia ka jingdon kane ka par ba tih dewiong beaiñ ha ka thaiñ.
Une u Heh Pulit u pyntip ba ïa ka ejahar halor kane ka kam beaiñ la rejister ha Khliehriat Police Station bad ka jingtohkit kaba bniah ka la ïaid mynta ban lapdien ïa ki jaka shalan ïa u dewiong bad ki briew kiba donkti ha kane ka kam.
Kane ka jingkhynra ka dei ka jingpyrshang kaba ïai bteng jong ki Pulit ka East Jaintia Hills ban tehlakam ïa ka kam tih dewiong beaiñ ha ka district.
U SP ula pynskhem biang ïa ka jingkut jingmut ban nym aili satia ïa ka kam tih dewiong beaiñ bad ba ka Tnad kan leh da kaba tyngeh ïa ki briew kiba donkti ha kane ka kam beaiñ.
Dang shen palat 30 ngut ki nongbylla dewiong ki la iap ha ka jingpynbthei bomb ha kawei ka par ha Mynsngat-Thangsko myn ha ka 5 tarik Rymphang 2026.
Ka Sorkar Jylla kala thung ïa ka Judicial Inquiry Commission ban tohkit ïa kane ka jingjia bad la ai por hynriew bnai ïa ka Commisson ba kan aiti ïa ka kaiphod. Kat kum ka kyndon tohkit, ka Commission kan tohkit ym tang ïa ka jingjia kaba jia ha ka 5 tarik Rymphang, 2026 hynrei kan tohkit ruh ïa ki daw tynrai jong ka jingtih dewiong beaiñ bad ba kan ai ïa ki jingai jingmut, ïa kaba, kat kum ka Commission of Inquiry Act, 1952 yn sa wanrah hapoh ka ïingdorbar.
Ka Director General of Police (DGP) Kong Idashisha Nongrang ka la thung ruh ïa ka Special Investigation Team (SIT) ban tohkit ïa ka daw tynrai halor ka jingbthei ka par tih dewiong bad ïa ka SIT yn khlieh da u Dy Inspector General of Police (ER) Vivekanand S Rathore.
