680 tylli ki ïingskul thymmai yn tei ka sorkar ha kylleng ka jylla hapoh ka ME, ong u Bah Lahkmen

Shillong, Lber 28: U Myntri ka tnad Pule Puthi Bah Lahkmen Rymbui ula pynbna ïa ka rai jong ka Sorkar ban tei ïa kumba 680 tylli ki ïingskul thymmai ha kylleng ka Jylla hapoh ka Phase-IV jong ka Mission Education (ME) .
“Kawei pa kawei ka skul la khmih lynti ba kin ïoh kumba T.70 lak,” ong u Bah Rymbui haba plie ïa ka Iingskul ba thymmai jong ka Darang LP School.
Haba phaikhmat sha ka jingpynroi ïa ki jingtei, u Myntri ula pynpaw ba bun ki prokram lah pyntreikam hapoh ka Mission Education bad pyntip ba ka Ïingskul ba dang shu plie ka dei shi bynta jong ka Mission Education Phase-III.
U Bah Rymbui ula kren ruh halor ki kam ba la pyntrei da ka Sorkar Jylla naduh u snem 2018 ban pynbha bad kyntiew ïa ka kam pule puthi.
U la ïathuh ba ha ka jingïakren bad u Myntri Rangbah Conrad K Sangma, ka Sorkar ka la ithuh ïa saw tylli ki païa ban tei pat ïa ka pule puthi-ki jingtei, ki nonghikai, ka policy, bad ki khynnah skul, kiba ïai bteng ban btin lynti ha ka jingpynkylla ïa ka rukom treikam.
U la pynbna ba ka Amlarem Constituency ka lah ban ïoh jingmyntoi hapdeng ka 8 haduh 11 tylli ki Ïingskul hapoh ki Phase ban wan jong ka Mission, kaba la khmih lynti ba kan kyntiew bha ïa ka jingdon ki jaka pule ba paka ha ka thaiñ.
Ha kane ka sngi, u Myntri ula aiti ruh ïa ka kamra computer ha ryngkat ki tiar ki tar, ba la bei tyngka na ka SRWP 2025-26, kaba thmu ban kyntiew ïa ka jingpule lyngba ki kor digital hapdeng ki khynnah skul.