Nongstoiñ, Lber 22: Kum ban bteng ïa ka jingpynshai paidbah jong ka halor ki jnit ki jnat kiba ïadei bad ka kam pisa tyngka, ban pynshlur ïa ki paidbah ki bym pat pynïasoh ïalade bad ki bank, ka Reserve Bank of Indïa Shillong mynta ka sngi, ka la pynlong ïa ka prokram pynshai paidbah ïa kaba la tip kum ka Field Level Financial Literacy Event (FLFLE) ha ïing Dorbar jong ka shnong Mairang Mission, Mairang.
Ha kane ka prokram la wan ban ïa don bynta da u Block Development Officer ka Mairang C&RD Block, u Bah C.P Mawkon, u General Manager u ba long ruh u ophisar ba dei peit ïa ka RBI, Shillong, u P.Gangte, ki nongtrei bank, ki nongtrei sorkar, ki Seng Treilang (Self Help Group), ki nongseng kam lajong bad kiwei kiwei.
Ha kane ka prokram, la ïoh ban pynshai paidbah halor kiba bun ki mat kiba kynthup ïa ka rukom treikam ka RBI, ka rukom buh jingujor haba kynduh jingeh ha ki kam kiba ïadei bad ka bank, ki lad jingïada na kiba bun ki jingshah thok shah shukor kiba ju jia na ka por sha ka por bad shaphang ki lad ki lynti ban pyndonkam da ka jingstad teknoloji ha ka kam pisa tyngka nalor kiwei de.
Ha kane ka sngi, ki bank kiba kynthup ïa ka State Bank of India bad ka Punjab National Bank ki la buh ‘counter’, na ka bynta ban pynïasoh ïa ki paidbah bad ki skhim sorkar bapher bapher bad la buh ‘counter’ ruh na ka bynta kito kiba kwah kylliang ïa ki pisa kiba lah jot. La ïoh ruh ban sam sanction ai ram (Loan sanction letter) kaba kot kyllum lang kumba shi klur tam sha ki riew shimet bad kumjuh ki SHG kiba la ïa wan ha kane ka sngi.