Panaji, Naitung 13 : Ka FC Goa ha ka sngi Balang ka la pynbna ba la thung ïa u Gouramangi Singh u rangïalehkai football barim ka ri India kum u asistant coach jong ka club na bynta ka samoi ïalehkai kaban wan.
U Gourmangi uba dei u rangïalehkai ba mih na ka Tata Football Academy, u la mih madan ïa ki club ba heh jong ka ri India ha ki 15 snem ka jingïaid lynti jong u ha ka kam ïalehkai football. Ki club kiba u la mih madan ki kynthup ïa ka Dempo SC, ha kaba u la ïoh rah nam lahduh jong ka National Football League (NFL) bad ka Federation Cup ha ka samoi 2004-05. Ha u snem ba bud, u la mih madan na bynta ka Mahindra United.
Hapdeng u snem 2007 bad 2012, utei u centre back u la ïalehkai na bynta ka Churchill Brothers, ha kaba bad katei ka club u la ïoh rah ïa ka I-League (2008-09), ar tylli jong ka IFA Shields (2009 bad 2011) bad ar tylli ïa ka Durand Cups (2009 bad 2011). Ha u 2010, u Gouramangi Singh uba dei na Manipur u la ïoh pdiang ïa ka khusnam AIFF’s Best Men’s Player of the Year award.
“Ban tip ïa ka club bad ka jingkhlaiñ jong ka ha ki jingïalehkai, kadei ka sienjam kaba khraw bad kaba biang bha ba ngan ïalam kum u nongai jinghikai. Ka Goa kadei kum ka ïing ba ar na bynta jong nga, da kaba ïalehkai hapoh ka jylla ha kine ki snem ba lah leit noh. Nga sngew ba ka long kaba biang tam ba ngan wanphai biang,” ong u Singh.
U Gourmangi, uba mih madan nyngkong ha ka ISL bad ka Chennaiyin FC ha u 2010, u la mih madan 70 sien na bynta ka ri India.
Ha u 2018, u Singh u la kylla long u coach ba pura hadien ba u la shongthait noh ban ïalehkai football. U Gourmangi uba ïoh ka A License na ka AIFF naduh u 2019 u la long teng kum u assistant coach jong ka Bengaluru United ha ki lai samoi ba lah dep.
U dei uba hakhmat eh na bynta ka FCBU ha ka lympung BDFA Super Division League, ha kaba ka kynhun ka la ïoh rah ïa ka nam lahduh ha ka samoi 2020-21 bad 2021-22 da kaba pynliem ïa ka Bengaluru FC. Ha ka por ba u long kum u nong ai jinghikai ka club ka la poi sha ka semi-final jong ka lympung ïalehkai Durand Cup ha u snem ba lah dep.
