Jop u ma Balen Thubru kum u President (JHTOA), kular ban ai ka jingshakri met bad mynsiem
Jowai, Lber 02: U ma Balen Thubru uba la jop 128 Vote kum u President ka Jaiñtia Hills Truck Owners’ Association (JHTOA), haka jingïathep vote bala pynlong mynta ka sngi ka 2 tarik u Lber, 2026, ia kaba la pynlong hajan ka Toll Gate 7-mer (Ialong), West Jaiñtia Hills District, bala pynïaid da u muktiar (lawyer) ma Marbhahki Rymbai bad u Chairman jong kane ka Election ma Smen Kyndait.
Hadien kane ka jingshah jied u ma Balen Thubru kum u President lyngba kane ka jingïathep vote (Secret ballot), haka jingkren sha ki lad pathai khubor, ula ong ‘un ai ka jingshakri met bad mynsiem bad kaba khuid ba suba sha ki paidbah kiba dei ki trai trok bad ki nongñiah trok’.
Shuh shuh ula kular ban trei da kaba ïatip lang bad khlem kano kano ka jingleh shiliang, ula kyntu bad khot lang ïa ki para dkhot kiba dei ki trai trok ba kim dei ban don ka jingïapyrshah iwei ïa iwei, hynrei dei ban ïatylli lang kum uwei u khiew bad kawei ka pliang khnang ban jop ïa kano kano ka jingdawa.
Na ka liang u ma Balen ula pynpaw ka jingai khublei ïa baroh kiba don bynta ban pynïaid ïa kane ka jingthep vote, kaba la angnud ban pyndep naduh kine ki sngi bala dep. Ha ka juh ka por ula kyntu ïa ki nongñiah trok ba kin wan sha ki jingïalang bad ban ïashim bynta ïa ha kino kino ki jingeh kiba ïa kynduh.
Ula pynsngew wat hapdeng ka jingbun jong ki seng bapher bapher hynrei ‘lada ngi ïoh ïa u nongïalam ba shisha ngi kyrmen ba u paidbah un don ka jingïatylli ha baroh ki liang’ ong ma Balen Thubru.
Ha kane ka sngi ki trai trok kila wan ban pyndep ïaka jingthep vote da kaba ïeng laiñ wat hapdeng u slap, kiba ïakhun ïa kane ka kam President (JHTOA) ki don saw (4) ngut kiba kynthup ïa u ma Balen Thubru uba la ïoh 128-Votes, ma Nangaibormi Sutnga 19-Votes, ma Heibor Siangshai 12-Vote bad ma Washing Roy Rymbai 11-Vote.
U ma Balen Thubru ula pyntip ruh ba ka General Meeting kan long lashai ka sngi 3 tarik u Lber, 2026 naduh ka por 11 baje na ka bynta ban jied ïa ki nongkitkam ba thymmai (office bearer) jong kane ka seng (JHTOA).
Na ka liang kiba ïakhun lang ïa kane ka Election President kila ai ka jingkitbok kitrwiang ïa u ma Balen Thubru ba un dang lah ban pynïaid shakhmat ïa ki kam bad ka jingmyntoi jong ka seng hi baroh kawei.