Tuid ki paid riewngeit sha ka Jingïaseng Samla KJP Synod Mihngi XXIV haka Balang Presbyterian Mynso

Jowai, Lber 01: Ka Jingïaseng Samla KJP Synod Mihngi kaba Arphew Saw (XXIV), kaba la long haka Balang Presbyterian Mynso, Mynso District, Mynso Presbytery kaba la sdang naduh 27 tarik u Rymphang bad kala poi noh sha kaba kut mynta ka sngi U Blei ka 1 tarik Lber, 2026 halor ka phang kaba ong “Tei ïa ka jingim jong phi ha U Khrist” (Kol 2:7).
Ha kane ka Jingïaseng Synod la pynïaid da u Rev. Dr. G.B. Pohshna, ha kaba ki paid riewngeit na kylleng ka Ri-Lum Khasi Jaiñtia bad na ri thor kila wan tuid ban ïoh sngew ïa ka ktien U Blei lyngba ki Nongkren ha ki Jingïaseng paidbah.
La sdang ïa ka Jingïaseng Synod haka sngi Thohdieng da kaba pdiang sngewbha ïaki nongwan naduh ki Pastor, ki Pro Pastor, ki Tymmen Basan, ki Dkhot bad ki Delegate, ha kaba la don ka Jingïaseng plie theme bud sa ka jingïalang pyrkhatkam kaba nyngkong (1) bad haka sngi Saitjaiñ la shong jingïalang pyrkhatkam ar sien (I,II), katba haka por janmiet kala don ka Variety Programme bala pynïaid da ka Jingïaseng Samla Jowai Presbytery.
Haka Por 1 baje shiteng mynta ka sngi U Blei ïa ka khubor naka ktien U Blei la sam da u Rev. C.S. Suchiang uba la pynshong nongrim na ka kitab u nongïathuh lypa Esekiel 22:30 kaba ong “Bad nga la wat ïa u briew uba napdeng jong ki, u ban pynïeng ka jingker bad u ban ïeng haka jingpra hakhmat jong nga na ka bynta ka ri, ba ngan ym pynjot ïa ka: hynrei, ngan shem satia”.
U Pastor u kyntu kyrpang ïa ki khun samla ka Balang halor ka jingeh kiba u Esekiel u ïa kynduh ha ka jingim bad la kyntu kum ki khun samla ‘ngim dei ban shah longmraw, hynrei dei ban long ki sakhi da kaba ym pyntngit ïalade bad ka pyrthei’, u ong U Blei u kwah ban pynïoh ha u ïa ka Burom haduh ka sngi ba un shim ka jingbishar ïa ka jingim.
Ula buh jingkylli ïa ki khun samla mynta ‘hangno phi buh ïa ka jingtip bad ki jingshemphang jong phi, hynrei mih noh shakhmat bad ka por kala dawa ban pynbha ïa kane ka jingpait jingpra bad ban pynthymmai ïa ka’ la kyntu u Pastor Suchiang.
Shuh shuh u khot ïa ki khun samla bad ki paid riewngeit baroh ba ka por kam don shuh mynta, la dei ka por ban mih shahmat ban pynim, ban tei bad pynkhuid ïa ka jingim da kaba tieng burom ïa U Blei kumba leh u Esekiel. Da kaba pynkut u ong ka jingim Khristan ka dei ban don ha shi lynter bad U Blei uba don ha baroh ki jaka bad uba tip lut ïaka jingim.
La pynrhem shuh shuh ïa kane ka Jingïaseng Paidbah da ki jingrwai na ki Choir haka por 10 baje mynstep da ka na ka Jingïaseng Samla Balang Presbyterian Amsohrhong, Moorathud, Lama bad Umdeinlin.Katba haka por 1:30 nohphai sngi la rwai da ka Jingïaseng Samla Balang Presbyterian Tilka, Umiew, Mynso bad ka Standing Choir JSKJPSM.
Mynta ka sngi naduh ka por mynstep 8 baje kala don ka Sacrament Jingkhawai U Trai, ka Jingïaseng Paidbah ha ka por 10 baje mynstep la don ka jingsam ïa ka Proficient Award, la ïoh ïa u Nongkren da u Rev. I.U.B. Pala, katba haka Jingïaseng por 6 shiteng janmiet la sam ïa ka khubor na ka ktien u Blei kaba ïadei bad ka Subject Balang “Ka bainong ha ka pla kaba pei thliew” (Hagai 1:6) la kren da u Rev. R.B. Marpna.
La pyntip ba ka Jingïaseng Synod Synod Mihngi kaba XXV (25) jong u snem 2027, kan long haka Balang Presbyterian Iapmala Rymbai District haki tarik 5-7 March, 2027 halor ka theme kaba ong “To hikai ruh na nga” Mathaios 11:29.