Ka elekshon sha Garo hills District Council, kan long ha ka 10 tarik Ïaïong 2026 bad da katei ka jing pynbna jong ka sorkar jylla, la ïohi, ba ki seng saiñ pyrthei, ki la sdang ban sei madan ïa ki kyrtong jong ki, ki ban ïakhun ïa katei ka elekshon; hynrei na ka liang jong ka seng VPP lane ka seng prah, la ïohi shai, ba kam don mon satia ban leit ïa pyni bor sha Garo hills, ha kane ka elekshon MDC, namar ba kam shym la leit ban lum ban lang, ha ki khyndiat bnai ba ladep sha ki bynta jong ka Garo hills hynrei ka la peit khliaw pat sha ka elekshon MLA.
Katei ka rai jong ka seng VPP, ban nym sei kyrtong ha ka elekshon MDC ha Garo hills, ka pyni shai namarkata, ba katei ka seng kan trei shitom bad kan duriap ïalade ban pynkhlaiñ tyngeh ha ki bynta jong ka Khasi bad Jaiñtia Hills lane ha ri Khasi baroh kawei bad katei kan dei ruh ka thong kaba kin buh ha khmat duh ha ka elekshon MLA 2028, ka ban long sa tang ar snem duna mynta bad katei ka pyni ruh ba ka seng VPP, kan trei tyngeh ha ki 36 tylli ki Constituency jong ka Khasi bad Jaiñtia hills.
Ka rai jong ka VPP ka long kaba donkam bha, namar ba katei ka seng, hi ka ïeng halor ka kyrteng jong U bah Ardent Basaiawmoit bad kumta ba un ïaid un ïeng ha ki bynta jong ka Khasi bad Jaiñtia Hills, kam da eh than, sha ki shnong ki thaw jong ki 36 tylli ki Constituency, hynrei lada un leit un wan shiphang sha Khasi bad shiphang sha Garo, kumta katei kan buh ïa ka jingeh kaba khraw ïa ki nongtrei jong katei ka seng bad kumjuh ïa ki kyrtong bad ïa ki paidbah, kiba ieid ïa katei ka seng ba dang thymmai. Kumba ka seng VPP, ka la jop don burom ha ka elekshon MP, ha u snem 2024 bad nangta ka la leh bha ruh ha ka elekshon MDC 2025, kumta ka long kaba donkam eh, ba kan trei borbah ha kito ki Constituency kiba ka khlaiñ, khnang ba kan ïoh ban leh bha ha ka elekshon MLA, ka ban long sa ar snem mynta.
Wat la ka jingïaleh kan long kaba ïatan tyllai bha, hynrei ki dak ki shin ki kdew, kumba ka NPP, kan hap ban ïakhun ïa ka elekshon MLA, ïa ki lai tylli ki seng kiba khlaiñ bha bad ki ban pynduh thiah pynduh dem ïa U Conrad Sangma bad kitei ki kynthup ïa ka VPP bad ka Congress na Khasi, Jaintia hills bad nangta sa ka kynhun jong U Mukul Sangma bad ka Congress na Garo hills.
Kam kut tang katta, hynrei ka jingshisha ka paw tyngkreiñ, ba ka seng BJP, kan leh tyngeh bha ha kane ka kynti jong u snem 2028 bad lada kan long kumta, ka jingiakhun kan long kaba jwat shibun eh ia ka NPP bad ia u heh duh jongka, U Conrad Sangma ha kane ka sien ka ba wan, khlem da khein shuh ia ki kynhun synrop jongu, lada dei ka UDP, HSPDP kiba la nang iap stai bad kiba lah ruh ban duh jait syndon, ha ki ar snem ban sa wan.
Lyngba ka jingdon bad jingkiew shaphrang jong ka seng VPP kan long ruh kaba eh ïa kiwei pat ki seng saiñ pyrthei ban ïakhun ïa ki elekshon, kumba la ïohi ba ka lyer jong u prah ka la kiew bha ha kine ki por.
Kumba long haduh mynta kiba bun na ki jingkynthoh ïa ki rynsan khubor paidbah la ïohi ba ki briew ki kwah ïa u Prah ban sei kyrtong ha ka elekshon MDC ka ban long ha Garo Hills naba kane ka seng kan lah ban ïakhun pyrshah ïa ka seng NPP ha kane ka kynti.
Na ka jingkhlad noh jong u MP barim ka Shillong Parliamentary Constituency ka Seng VPP ka la ïoh ka jingkyrshan kaba ratbah bha na ki paidbah halor ki kam ba la leh da u MP barim u Dr. Ricky Syngkon kiba bun na ki paidbah ki la pynpaw ïa ka jingmon ban ïoh biang ïa kum une u juh u MP barim uba lah ban rah ïa ki mat ki jura jong ka jylla ha kiba bun ki liang, kum ka ILP, nangta ka jingpynrung ïa ka ktien Khasi bad Garo hapoh ka khyrnit kaba 8 jong ka riti synshar jong ka ri India.
Ka sur kaba bun hi ka ong ba dang donkam ïa u nongïalam Khasi uba biang ka jingmut jingpyrkhat bad kumjuh ruh uba lah ban ïasaid na ka bynta ka jylla hi baroh kawei khnang ba ki jingeh kiba donkam jong ka jylla yn lah ban ïasaid bad ïakren ha kiba bun ki liang.
