Sohra, Lber 01: Ka Marbisu CC bad ka Cricket Smit ki la jop ïa la ki jong ki jingïalehkai ha ka lympung 5th District League T20 Cricket Tournament 2026 ba la pynïaid da ka East Khasi Hills Cricket Association, ha Saitsohpen, Sohra.
Na ka liang jong ka Marbisu ka la jop da 8-wiket pyrshah ïa ka Sohra Combine, katba ka Cricket Smit ka la pynliem da ka said da 5 ron ïa ka Royal Challengers Mawsynram ha ka jingïalehkai kaba bud.
Haba tied nyngkong hadien ba jop ïa ka jingkynting pisa (toss) ka Sohra Combine ka la ïohlad ban kamai 114 ron bad hap 6 wiket haduh kaba kut ki 20 ober. U Jona Lyngdoh Nonglait u la noh synñiang 37 ron naki 32 bol, katba u Hameki Susngi u la khur 2/16 naki 4 ober.
Haba jubab, u Hameki u la khyrwit 77 ron naki 44 tylli ki bol ban ïalam ïa ka Marbisu sha ka jingjop, da kaba kynjoh 118 ron bad hap 2 wiket tang haki 13.3 ober. Ka jingïalehkai ba kyrpang jong u Hameki ka la pynlong ruh ïa u ban khur ïa ka nam Player of the Match.
Nangta ha ka jingïalehkai kaba bud, ka Cricket Smit kaba la shah pyntied nyngkong, ka la kamai 134/7 haki 20 ober, ha kaba u Bashaikupar Nongdhar u la tied 28 ron naki 14 tylli ki bol, katba u Pynkhraw Jomati u la khur 2/8 haki 2 ober.
Haba pyrshang jubab ka Royal Challenger Mawsynram ka la duna tang khyndiat ban poi sha ka thong, da kaba kamai 129/5 haki 20 ober, bad u Richie Shangpliang u la noh synñiang 46 ron naki 39 bol.
U Pynkhrawbok Thabah jong ka Cricket Smit, uba la khur 2/17 haki 4 ober. u la shah jied ban khur ïa ka khusnam Player of the Match.
