Shillong, Lber 01: Ka Young Guns CCka la pynliem noh da 5 wiket ïa ka NFU ha kawei na ki jingïakhun jong ka lympung Shillong Cricket League Super Division 2026 ba la pynïaid da ka Shillong Cricket Association, ha Polo hynne ka sngi u Blei.
Hadien ba ka pynkhyllem noh ïa baroh 10 ngut ki nongtied jong ka NFU kaba la kamai 181 ron haki 42 ober, ka Young Guns ka la pyndep ïa ka kamram da kaba kamai 182/5 haki 36.2 ober.
Ha ka pali tied jong ka NFU dei tang u Kevin Christopher (58 ron naki 71 bol) bad u Bharat Gurung (30 ron naki 40 bol) kiba kham seisoh, katba u Mewankitbok jong ka Young Guns, u la khur 2/32 naki 9 ober.
U Rudra Singh Rathor u la long u nongtied ba kongsan jong ka Young Guns, da kaba kamai 84 ron naki 96 bol khlem da shah pynhap (not out) kaba la pynlong ruh ïa u ban khur ïa ka nam Player of the Match, katba u Manthan Dey u la ïohlad ban noh synñiang 37 ron naki 38 bol.
